নিয়মীয়া বাৰ্তা, ১৪ মাৰ্চঃ তাৰকা উইকেটৰক্ষক ঋষভ পণ্টে ভাৰতীয় খেলুৱৈ হিচাপে টেষ্টত দ্রুততম অর্ধশতক অর্জন কৰিছে৷ শ্রীলংকাৰ বিৰুদ্ধে বেংগালুৰুত চলি থকা দিবা–নৈশ টেষ্টৰ দ্বিতীয় দিনা আক্রমণাত্মক বাঁওহতীয়া বেটছমেনগৰাকীয়ে মাত্র ২৮টা বলত ৫০ ৰানৰ দর্শনীয় ইনিংছ খেলে৷ তেওঁ ৭টা বাউণ্ডেৰী আৰু দুটা ছিক্সাৰৰ সহায়ত অভিলেখ সৃষ্টিকাৰী ইনিংছটো সজায়৷ ভাৰতীয় বেটছমেন হিচাপে টেষ্টত দ্রুততম অর্ধশতকৰ অভিলেখ ৰচাৰ ক্ষেত্রত তেওঁ কিংবদন্তি অলৰাউণ্ডাৰ কপিল দেৱৰ অভিলেখ ভংগ কৰে৷ কপিল দেৱে ১৯৮২ত পাকিস্তানৰ বিৰুদ্ধে কৰাচী টেষ্টত মাত্র ৩০ বলত অর্ধশতক অর্জন কৰিবলৈ সক্ষম হৈছিল৷ ইফালে, পণ্টে আজি টেষ্টত উইকেটৰক্ষক হিচাপে দ্রুততম অর্ধশতকৰ গৰাকী হয়৷ তেওঁ ধোনীৰ ৩৪ বলৰ অভিলেখ ভংগ কৰে৷