নিয়মীয়া বাৰ্তা, ২৩ আগষ্ট: দেশৰ সর্বোচ্চ ক্রীড়া সন্মান খেলৰত্ন বঁটা অনুৰাগীৰ নামত উছর্গা কৰিছে টীম ইণ্ডিয়াৰ তাৰকা বেটছমেন ৰোহিত শর্মাই৷ অনুৰাগীৰ অভূতপূর্ব সমর্থনত অভিভূত হৈ পৰা অ’পেনাৰগৰাকীয়ে আজি ছ’চিয়েল মিডিয়াত কয় যে সমর্থকৰ মৰম–চেনেহ আৰু উৎসাহ–উদ্দীপনা অবিহনে খেলৰত্ন লাভ কৰাটো কেতিয়াও সম্ভৱ নহ’লহেঁতেন৷
উল্লেখ্য যে টীম ইণ্ডিয়াৰ এদিনীয়া দলৰ উপ–ধিনায়ক ৰোহিত শর্মা আৰু হকী খেলুৱৈ ৰাণী ৰামপাল, মল্লযুঁজাৰু ভিনেশ ফ’গাট, পেডলাৰ মণিকা বাত্রা আৰু পেৰা এথলীট টি মাৰিয়াপ্পালৈ চলিত বর্ষৰ খেলৰত্ন বঁটা আগবঢ়োৱা হৈছে৷ ‘খেলৰত্নৰ দৰে সন্মানীয় বঁটা লাভ কৰাটো মোৰ বাবে গৌৰৱৰ কথা৷ ইয়াক লৈ মই অত্যন্ত সুখী৷ আপোনালোকৰ সমর্থন অবিহনে এয়া কেতিয়াও সম্ভৱ নহ’লহেঁতেন৷’– ৰোহিতে এইদৰে কয়৷
ইফালে, খেলৰত্ন বঁটা বিজয়ী ৰোহিত শর্মাৰ লগতে অর্জুন বঁটা বিজয়ী ঈশান্ত শর্মা আৰু মহিলা ক্রিকেটাৰ দীপ্তি শর্মাক ভাৰতীয় ক্রিকেট নিয়ন্ত্রণ ব’র্ডে অভিনন্দন জনাইছে৷ উল্লেখ্য যে ৰোহিত শর্মা হ’ল খেলৰত্ন বঁটা লাভ কৰা দেশৰ চতুর্থগৰাকী ক্রিকেটাৰ৷