নিয়মীয়া বাৰ্তা, ২৭ ছেপ্টেম্বৰঃ কলকাতা নাইট ৰাইডার্ছৰ বিৰুদ্ধে বিস্ফোৰক ৮০ ৰানৰ ইনিংছেৰে আই পি এলত দুর্দান্ত ফর্মৰ ইংগিত দিছে মুম্বাই ইণ্ডিয়ানছৰ অধিনায়ক ৰোহিত শর্মাই৷ সুবিশাল ছিক্সাৰ কোবোৱাৰ বাবে বিশ্ব ক্রিকেটত বিশেষভাৱে পৰিচিত অ’পেনাৰগৰাকীয়ে এইবাৰ বি চি চি আইৰ ঐশ্বর্যশালী টি–২০ লীগত একপ্রকাৰ ৰানৰ জোৱাৰ তোলাৰ লক্ষ্যৰে ইউ এ ইলৈ ৰাওনা হৈছিল৷ ইয়াৰ বাবে তেওঁ নিজৰ ক্রিকেট বেগত ৯খনকৈ পছন্দৰ বেট মৰুৰ দেশলৈ কঢ়িয়াই নিছে৷ আই পি এলৰ দৰে আকর্ষণীয় টি–২০ লীগত যথেষ্ট পৰিমাণে বিগ হিটিং শ্বট খেলিবলগীয়া হয় বাবে সঘনাই বেট ভঙাৰ আশংকা থকাৰ বাবেই ৰোহিতে ৯খনকৈ বেট কঢ়িয়াই নিয়া বুলি সদৰী কৰিছে৷
মুম্বাই ইণ্ডিয়ানছৰ অফিচিয়েল টুইটাৰ একাউণ্টত প’ষ্ট কৰা এক ভিডিঅ’ত তাৰকা বেটছমেনগৰাকীয়ে কয় যে মহামাৰী ক’ভিড–১৯ৰ বাবে সম্প্রতি চৌদিশে এক জটিল পৰিস্থিতি চলি আছে৷ সেয়ে তেওঁ সতর্কতামূলক ব্যৱস্থা হিচাপে ৯খনকৈ বেট স্বদেশৰ পৰা নিজৰ লগত লৈ গৈছে৷ ‘আই পি এলৰ দৰে টি–২০ ফৰমেটত মোৰ বেট এমাহ বা দুমাহে বর্তি থাকে৷ সম্প্রতি পৰিস্থিতি জটিল হৈ থকাৰ বাবে সময়ত মই কুৰিয়াৰৰ ওপৰত ভৰসা কৰিব নোৱাৰোঁ৷ সেয়ে আগতীয়াকৈ মই ৯খন বেট যোগাৰ কৰি ৰাখিছোঁ৷’ ৰোহিতে এইদৰে কয়৷