নিয়মীয়া বাৰ্তা ২৮ জুনঃ ক্রিকেটৰ আটাইকেইটা সংস্কৰণত অভিষেক ঘটোৱা ভাৰতৰ সর্বকনিষ্ঠ ক্রিকেটাৰ হিচাপে চিহ্ণিত হৈছে উদীয়মান অ’পেনাৰ শেফালি বার্মা৷ ইংলেণ্ড মহিলা দলৰ বিৰুদ্ধে আজি অনুষ্ঠিত প্রথম এদিনীয়াত ভাৰতীয় দলৰ জার্ছী পৰিধান কৰি খেলপথাৰত নমাৰ লগে লগে উদীয়মান ক্রিকেটাৰগৰাকীয়ে এই বিৰল কৃতিত্ব অর্জন কৰিবলৈ সক্ষম হয়৷ হাৰিয়ানাৰ মহিলা ক্রিকেটাৰগৰাকীয়ে ১৭ বছৰ ১৫০ দিনত ভাৰতৰ হৈ ক্রিকেটৰ আটাইকেইটা সংস্কৰণত অভিষেক ঘটোৱাৰ সুযোগ লাভ কৰে৷
ইয়াৰ পূর্বে শেফালিয়ে ইংলেণ্ডৰ বিৰুদ্ধে শেহতীয়াকৈ অনুষ্ঠিত এখন মেচৰ টেষ্ট শৃংখলাত ভাৰতীয় টেষ্ট দলৰ হৈ অভিষেক ঘটাইছিল৷ অভিষেক টেষ্টত তেওঁ ৯৬ আৰু ৬৩ ৰানৰ দুটা আকর্ষণীয় ইনিংছ খেলি প্রতিভাৰ প্রমাণ দিছিল৷ মহিলা টেষ্ট ক্রিকেটৰ অভিষেক মেচত দুটা অর্ধশতক অর্জন কৰা তেওঁ হ’ল সর্বকনিষ্ঠ খেলুৱৈ৷ আন্তঃৰাষ্ট্রীয় পর্যায়ত সর্বকনিষ্ঠ অভিষেককাৰী খেলুৱৈ হিচাপে তেওঁৰ স্থান হ’ল পঞ্চম৷ এই তালিকাৰ প্রথম স্থানত আছে আফগানিস্তানৰ মুজিবুৰ ৰহমান৷ তেওঁ ১৭ বছৰ ৭৮ দিনত ক্রিকেটৰ আটাইকেইটা সংস্কৰণত অভিষেক ঘটাইছিল৷