নিয়মীয়া বাৰ্তা, ১২ ছেপ্টেম্বৰঃ আভ্যন্তৰীণ খেলিমেলি আৰু বিত্তীয় অনিয়মৰ বাবে দক্ষিণ আফ্রিকা ক্রিকেট ব’ৰ্ডক দেশখনৰ চৰকাৰে নিলম্বন কৰিছে৷ এই অনুসৰি এতিয়াৰে পৰা দেশখনৰ ক্রিকেটৰ সৈতে জড়িত সকলো গতিবিধি দক্ষিণ আফ্রিকা চৰকাৰে নিয়ন্ত্রণ কৰিব৷ চৰকাৰৰ এই হস্তক্ষেপৰ ফলত দক্ষিণ আফ্রিকা ক্রিকেট ব’ৰ্ড আই চি চিৰ দ্বাৰাও নিলম্বিত হোৱাৰ সম্ভাৱনা আছে৷
উল্লেখ্য যে ২০১৯ৰ জুলাইত আই চি চিয়ে জিম্বাব’ৱে আৰু নেপাল চৰকাৰৰ হস্তক্ষেপৰ বাবে দেশ দুখনৰ ক্রিকেট ব’ৰ্ডক নিলম্বিত কৰিছিল৷ অৱশ্যে অক্টোবৰত ডুবাইত অনুষ্ঠিত ব’ৰ্ডৰ বৈঠকত জিম্বাব’ৱে আৰু নেপালে আই চি চিৰ সদস্য পদ পুনৰ ওভতাই পাইছিল৷
মন কৰিবলগীয়া যে দক্ষিণ আফ্রিকা ক্রিকেট দলটো ১৯৭০ চনতো ২১ বছৰৰ বাবে নিলম্বিত হৈছিল৷ এই নিলম্বনৰ ম্যাদ অন্ত পেলাই দলটোৱে ১৯৯২ত প্রথমবাৰৰ বাবে এদিনীয়া বিশ্বকাপ খেলাৰ সুযোগ পাইছিল৷ বর্ণ–বৈষম্য নীতিৰ বাবে দক্ষিণ আফ্রিকা চৰকাৰে দেশখনৰ ক্রিকেট দলটোক ২১ বছৰৰ বাবে নিলম্বিত কৰিছিল৷