নিয়মীয়া বাৰ্তা, ৫ জুলাই: পুষ্টিকৰ খাদ্য বিচাৰি বিমুখ হোৱা বিতর্কিত মল্লযুঁজাৰু সুশীল কুমাৰে এইবাৰ জে’লৰ ভিতৰত টিভি বিচাৰি জে’ল কর্তৃপক্ষক আবেদন জনাইছে৷ তিহাৰ জে’লৰ এগৰাকী জ্যেষ্ঠ বিষয়াই আজি এই কথা জানিবলৈ দিছে৷ দেশ–বিদেশৰ খেলৰ খবৰসমূহ লাভ কৰিবলৈ সুশীল কুমাৰে জে’লৰ ভিতৰত টিভিৰ ব্যৱস্থা কৰিবলৈ আবেদন জনোৱা বুলি বিষয়াগৰাকীয়ে প্রকাশ কৰিছে৷
উল্লেখ্য যে উদীয়মান মল্লযুঁজাৰু সাগৰ ৰাণাক বর্বৰভাৱে আক্রমণ কৰি হত্যা কৰাৰ অভিযোগত দুবাৰৰ অলিম্পিক পদক বিজয়ী তাৰকা মল্লযুঁজাৰু সুশীল কুমাৰক যোৱা ২৩ মে’ত দিল্লী আৰক্ষীয়ে গ্রেপ্তাৰ কৰিছিল৷ এই ঘটনাৰ সৈতে জড়িত থকাৰ অভিযোগত সুশীলকে ধৰি মুঠ ১২গৰাকী লোকক আৰক্ষীয়ে গ্রেপ্তাৰ কৰিছে৷ বিতর্কিত ক্রীড়াবিদগৰাকী এই হত্যাকাণ্ডৰ মাষ্টাৰমাইণ্ড বুলি দিল্লী আৰক্ষীয়ে আদালতক জানিবলৈ দিছে৷
মন কৰিবলগীয়া যে ইয়াৰ পূর্বে সুশীল কুমাৰে শাৰীৰিক শক্তি অটুট ৰাখিবলৈ পুষ্টিকৰ আহাৰ বিচাৰি আদালতৰ দ্বাৰস্থ হৈছিল৷ কিন্তু দিল্লীৰ আদালতে তেওঁৰ এই আবেদন খাৰিজ কৰিছিল৷