নিয়মীয়া বাৰ্তা, ১১ জুনঃ ভাৰতীয় ক্রিকেট দলৰ অনুৰাগীলৈ সুখবৰ৷ অচিৰেই তেওঁলোকৰ ফেভাৰিট খেলুৱৈসকলক খেলপথাৰত প্রত্যক্ষ কৰিব পাৰিব৷ কিয়নো অহা আগষ্ট মাহত বিৰাট কোহলি নেতৃত্বাধীন ভাৰতীয় ক্রিকেট দলটোৱে এদিনীয়া আৰু টি–২০ শৃংখলাত অংশ লোৱাৰ উদ্দেশ্যে শ্রীলংকা ভ্রমণ কৰাৰ পূর্ণ সম্ভাৱনা আছে৷ ইতিমধ্যে ভাৰতীয় দলটোৰ এই ভ্রমণত সেউজ সংকেত দিছে ভাৰতীয় ক্রিকেট নিয়ন্ত্রণ ব’র্ডে৷ মন কৰিবলগীয়া যে ভাৰতীয় ক্রিকেট দলটোৱে পূর্বৰ সূচী মতে জুন মাহত শ্রীলংকা ভ্রমণ কৰাৰ কথা আছিল যদিও মহামাৰী ক’ৰোনা ভাইৰাছৰ ভয়াৱহতাৰ বাবে টীম ইণ্ডিয়াৰ শ্রীলংকা ভ্রমণত বাধাৰ সৃষ্টি হয়৷ ভাৰতীয় দলটোৰ ভ্রমণ সন্দর্ভত স্পষ্ট মতামত বিচাৰি বিগত মাহত শ্রীলংকান ক্রিকেট ব’র্ডে বিচিচিআইলৈ পত্রও প্রেৰণ কৰিছিল৷ অৱশেষত বিচিচিআয়ে টীম ইণ্ডিয়াৰ এই ভ্রমণত সেউজ সংকেত দিয়ে৷ উল্লেখ্য যে শ্রীলংকা ভ্রমণকালত ভাৰতীয় দলটোৱে তিনিখন এদিনীয়া আৰু তিনিখন টি–২০ মেচত অংশগ্রহণ কৰিব৷