নিয়মীয়া বাৰ্তা, ১৭ অক্টোবৰঃ ৰাজ্যৰ ক্রিকেটৰ সামগ্রিক উন্নয়নৰ বাবে এক ইতিবাচক পৰিৱেশ ৰচনা কৰাৰ লক্ষ্যৰে অসম ক্রিকেট সন্থাই চলিত বর্ষৰ পৰা প্রৱর্তন কৰা এ চি এ বার্ষিক বঁটা মুখ্যমন্ত্রী সর্বানন্দ সোণোৱালে শুকুৰবাৰে বর্ষাপাৰা ক্রিকেট ষ্টেডিয়ামত অনুষ্ঠিত এক কার্যসূচীত কেইবাগৰাকীও প্রতিভাশালী ক্রিকেটাৰক প্রদান কৰে৷
এই অনুসৰি অসম ৰঞ্জি দলৰ অভিজ্ঞ বেগী বলাৰ ৰঞ্জিৎ মালীয়ে বর্ষশ্রেষ্ঠ খেলুৱৈৰ বঁটা, দশৰথ কুমাৰে বর্ষশ্রেষ্ঠ প্রতিভাশালী খেলুৱৈৰ বঁটা আৰু শুভ্রজিৎ শইকীয়াই বর্ষশ্রেষ্ঠ প্রশিক্ষকৰ বঁটা লাভ কৰে৷ এই বঁটাৰ সৈতে আছে একোটাকৈ স্মাৰক আৰু আর্থিক পুৰস্কাৰৰ চেক৷
অসম ৰাজ্যিক প্রিমিয়াৰ লীগত খিতাপ অর্জন কৰা ৰাজ্যৰ কেইবাটাও ক্রিকেট ক্লাবক মুখ্যমন্ত্রী সোণোৱালে এক লাখকৈ টকাৰ আর্থিক অনুদান আগবঢ়ায়৷ অনুষ্ঠানত তেওঁ কয় যে ক্রীড়াই সমাজত সদ্ভাৱনা আৰু আন্তৰিকতা গঢ় দিয়ে৷