নিয়মীয়া বাৰ্তা ১৭ আগষ্টঃ উইকেটৰক্ষক হিচাপে যিকোনো পকেটমাৰতকৈ দ্রুত আছিল মহেন্দ্র সিং ধোনী৷ অনাগত ভৱিষ্যতৰ বাবে তেওঁ ক্রিকেটৰ পৰিভাষা সলনি কৰিছে৷ –এই মন্তব্য আগবঢ়াইছে টীম ইণ্ডিয়াৰ প্রশিক্ষক ৰবি শাস্ত্রীয়ে৷ স্বাধীনতা দিৱসৰ সন্ধিয়া আকস্মিকভাৱে আন্তঃৰাষ্ট্রীয় ক্রিকেটক বিদায় জনোৱা ধোনীৰ প্রতি সন্মান প্রদর্শন কৰি প্রশিক্ষকগৰাকীয়ে কয় যে ধোনী প্রকৃতার্থত এগৰাকী অদ্বিতীয় ক্রিকেটাৰ৷ পৰৱর্তী প্রজন্মৰ বাবে তেওঁ ক্রিকেটৰ পৰিভাষা সলনি কৰি থৈ গ’ল৷ টি–২০ বিশ্বকাপ, এদিনীয়া বিশ্বকাপ আৰু আইচিচি চেম্পিয়নছ ট্রফীৰ লগতে কেইবাবাৰো আইপিএলৰ খিতাপ জয় কৰা ধোনীৰ দৰে ক্রিকেটাৰ লাভ কৰিবলৈ ভাৰতে দীঘলীয়া সময়লৈ অপেক্ষা কৰিব লাগিব বুলিও শাস্ত্রীয়ে উল্লেখ কৰে৷