নিয়মীয়া বাৰ্তা ৩১ আগষ্টঃ অহা বর্ষৰ জানুৱাৰীত প্রথমটো সন্তানৰ পিতৃ হ’ব টীম ইণ্ডিয়াৰ অধিনায়ক বিৰাট কোহলি৷ পত্নী অনুষ্কা সম্প্রতি সন্তানসম্ভৱা বুলি কোহলিয়ে দুদিন পূর্বে ছ’চিয়েল মিডিয়াত আনুষ্ঠানিকভাৱে ঘোষণা কৰিছিল৷ সম্প্রতি ডুবাইত থকা দম্পতীটোৱে এই সুখবৰৰ বাবে যোৱানিশা ৰয়েল চেলেঞ্জার্ছ বাংগালুৰুৰ সতীর্থসকলৰ সৈতে কেক কাটি আনন্দ উদযাপন কৰে৷
ছ’চিয়েল মিডিয়াত কোহলি আৰু অনুষ্কাই কেক কাটি থকাৰ ফটো আৰু ভিডিঅ’ ভাইৰেল হৈ পৰিছে৷ মন কৰিবলগীয়া যে ২০১৭ৰ ডিচেম্বৰত ইটালীত এক ব্যক্তিগত অনুষ্ঠানত ক্রিকেটাৰ কোহলি আৰু বলীউডৰ মোহময়ী অভিনেত্রী অনুষ্কা শর্মা বিবাহপাশত আবদ্ধ হৈছিল৷ ইয়াৰ পূর্বে তেওঁলোক প্রায় পাঁচ বছৰ প্রেমৰ সম্পর্কত আবদ্ধ হৈ আছিল৷ ইটালীৰ পৰা উভতি আহি চেলিব্রিটী দম্পতীটোৱে মুম্বাই আৰু দিল্লীত বিবাহৰ ৰাজকীয় অভ্যর্থনা অনুষ্ঠানৰ আয়োজন কৰে৷