শচীনৰ শৰণাপন্ন হওক বিৰাট কোহলি

নিয়মীয়া বাৰ্তা ২৭ আগষ্টঃ ক্রিকেটৰ ভগৱানখ্যাত মাষ্টাৰ ব্লাষ্টাৰ শচীন ৰমেশ তেণ্ডুলকাৰৰ শৰণাপন্ন হ’বলৈ বিৰাট কোহলিক আহ্বান জনাইছে সুনীল গাভাস্কাৰে৷ ভাৰতৰ একালৰ মহান বেটছমেনগৰাকীয়ে টীম ইণ্ডিয়াৰ অধিনায়কগৰাকীৰ দুর্বল ফর্মক লৈ উদ্বিগ্ণতা প্রকাশ কৰি কয় যে কোহলিয়ে শীঘ্রে তেণ্ডুলকাৰৰ সৈতে যোগাযোগ কৰি তেওঁৰ পৰামর্শ গ্রহণ কৰা উচিত৷ বুধবাৰৰ পৰা আৰম্ভ হোৱা তৃতীয় টেষ্টতো দীঘলীয়া ইনিংছ খেলাত ব্যর্থ হোৱা কোহলিক এই পৰামর্শ আগবঢ়াই গাভাস্কাৰে কয় যে তেণ্ডুলকাৰেও দীর্ঘদিন ধৰি দুর্বল ফর্মত ভুগিছিল৷ কিন্তু ২০০৪ৰ ছিডনী টেষ্টত অষ্ট্রেলিয়াৰ বিৰুদ্ধে তেওঁ দুর্দান্ত বেটিঙেৰে স্বাভাৱিক ছন্দ উদ্ধাৰ কৰিবলৈ সক্ষম হৈছিল৷ ধাৰাবাহিক ব্যর্থতাৰ পিছত কিদৰে শচীনে ফর্ম উদ্ধাৰ কৰিছিল, সেয়া কোহলিয়ে জনা উচিত আৰু তাৰ পৰা টীম ইণ্ডিয়াৰ অধিনায়কগৰাকী অনুপ্রাণিত হ’ব পাৰিব৷

‘কোহলিয়ে শীঘ্রে শচীনলৈ ফোন কৰা উচিত আৰু কি কৰা উচিত সুধিব লাগে৷ শচীনে ছিডনীত কিদৰে ফর্ম উদ্ধাৰ কৰি উজলি উঠিছিল সেয়া কোহলিয়ে সোধা উচিত৷ কোহলিয়ে নিজকে সোধা উচিত যে তেওঁ কিয় ক’ভাৰ ড্রাইভ খেলিব পৰা নাই, এই সন্দর্ভতো তেওঁ শচীনৰ সৈতে আলোচনা কৰিব পাৰে’– গাভাস্কাৰে এইদৰে কয়৷

উল্লেখ্য যে ২০১৯ৰ নৱেম্বৰতে অন্তিমটো আন্তঃৰাষ্ট্রীয় শতক অর্জন কৰা কোহলিয়ে এই পর্যন্ত ইংলেণ্ড ভ্রমণত এটাও অর্ধশতক সম্পূর্ণ কৰিব পৰা নাই আৰু তিনিখন টেষ্টত মাত্র ৬৯ ৰানহে সংগ্রহ কৰিছে৷ বুধবাৰে তেওঁ জেমছ এণ্ডাৰছনৰ বলত টেষ্ট ক্রিকেটত সপ্তমবাৰৰ বাবে আউট হয়৷ অফ ষ্টাম্পৰ বাহিৰৰ বলত ড্রাইভ শ্বট খেলাৰ চেষ্টা চলাওঁতে তেওঁ উইকেটৰক্ষকৰ হাতত কেচ দি পেভিলিয়নমুখী হয়৷

মন কৰিবলগীয়া যে ২০০৩–০৪ৰ অষ্ট্রেলিয়া ভ্রমণৰ চতুর্থখন টেষ্টত তেণ্ডুলকাৰে ক’ভাৰ ড্রাইভ খেলাৰ পৰা বিৰত থাকি অত্যন্ত সাৱধানে খেলি ২৪১ ৰানৰ অপৰাজিত ইনিংছ খেলিছিল৷ তেওঁৰ এই মাৰাথন ইনিংছৰ সহায়ত ভাৰতে ৭০৫ ৰানৰ স্ক’ৰ থিয় কৰাবলৈ সক্ষম হৈছিল৷ উক্ত ইনিংছটোত শচীনে ৪৩৬টা বলৰ সন্মুখীন হৈছিল৷ তেণ্ডুলকাৰৰ এই স্মৰণীয় ইনিংছটোৱে কোহলিক অনুপ্রাণিত কৰিব পাৰে বুলি গাভাস্কাৰে আজি মন্তব্য আগবঢ়াইছে৷