নিয়মীয়া বাৰ্তা, ২৪ মেঃ জনস্বাস্থ্য বিভাগে এইবাৰ পানীৰ স’তে কুঁচিয়াৰ পোৱালি যোগান ধৰাৰ অভিযোগ উঠিছে৷ আজি পুৱা মঙলদৈৰ কবিকাৰা পানীযোগান আঁচনিৰ অধীনৰ কবিকাৰা গাঁৱৰ চিত্রলেখা হাজৰিকাই পাইপৰ পানী সংগ্রহ কৰি থকা সময়তে কুঁচিয়াৰ পোৱালিটো ওলাই আহে৷ হতবাক মহিলাগৰাকীয়ে বিষয়টো সদৰী কৰাত বিভিন্ন লোকে প্রত্যক্ষ কৰে কুঁচিয়াডাল৷ অভিযোগ মতে পানী যোগান ধৰা পাইপ বিভিন্ন ঠাইত ফাট মেলাৰ লগতে ঠিকাদাৰে পালমৰাকৈ মেৰামতি কৰাৰ বাবেই কুঁচিয়াৰ প্রৱেশ ঘটিছে মূল পাইপত৷ মাজে মাজে ঘোলাপানীও যোগান ধৰাৰ উদাহৰণ আছে৷ এইদৰে কেতিয়াবালৈ সাপো ওলাব পাৰে বুলি ৰাইজে সন্দেহ প্রকাশ কৰিছে৷