নিয়মীয়া বার্তা,২৪ মেঃ অসমীয়া সংগীতৰ জগতৰ এক অবিচ্ছেদ্য অংগ হৈছে জিকিৰ–জাৰি৷ জিকিৰৰ অমিয়া সুৰে পুলকিত কৰে সকলোৰে মন৷ পিছে এই জিকিৰ এইবাৰ আপুনি শুনিবলৈ পাব হিন্দী ভাষাত৷ পোনপ্রথমবাৰৰ বাবে ৰাষ্ট্রীয় ভাষা হিন্দীত বাণীবদ্ধ হৈছে এটা জিকিৰ৷ সেইটো হৈছে ‘মোৰ মনত ভেদ ভাব নাই অ’ আল্লা, মোৰ মনত ভিন পৰ নাই৷’ আমাৰ সকলোৰে চিনাকি এই জিকিৰটোৱেই পোনপ্রথমবাৰৰ বাবে শুনিবলৈ পোৱা গৈছে হিন্দী ভাষাত৷ দেৰগাঁৱৰ অনাতাঁৰ শিল্পী ৱাজিদুৰ ৰহমানে এই হিন্দী জিকিৰটো বাণীবদ্ধ কৰিছে৷ জিকিৰক বিশ্ববাসীৰ আগত চিনাকি কৰাৰ উদ্দেশ্যেই এই বিশেষ জিকিৰটো হিন্দী ভাষালৈ অনুবাদ কৰি বাণীবদ্ধ কৰোৱাৰ চিন্তা কৰে শিল্পী ৱাজিদুৰ ৰহমানে৷ ইতিমধ্যে ৰেকর্ডিং, চিত্রগ্রহণৰ কাম সমাপ্ত হৈছে৷ য়াছমিন চুলতানা ৰহমানকে আদি কৰি কেইবাগৰাকীও মহিলা কণ্ঠশিল্পীয়ে কণ্ঠ দিয়া জিকিৰটো ঈদৰ প্রাক মুহূর্তত ৰাইজলৈ আগবঢ়াই দিব জিকিৰ শিল্পী ৱাজিদুৰ ৰহমানে বুলি জানিবলৈ দিয়ে