নিয়মীয়া বাৰ্তা, ২৩ মেঃ অসম প্রদেশ কংগ্রেছ কমিটীৰ সভাপতি তথা ৰাজ্যসভাৰ সাংসদ ৰিপুণ বৰাক পত্নীসহ গুৱাহাটীৰ ৰেডিচন ব্লু হোটেলত কোৱাৰেণ্টাইন কৰা হৈছে৷ বৃহস্পতিবাৰে নিশা দিল্লীৰ পৰা ৰাজধানী এক্সপ্রেছযোগে আহি তেওঁ গুৱাহাটীত উপস্থিত হৈছিল৷ ইয়াৰ পিছত আন যাত্রীৰ দৰে তেওঁক পত্নীসহ সৰুসজাই কোৱাৰেণ্টাইন চেণ্টাৰলৈ লৈ যোৱা হয়৷ ইয়াত যাৱতীয় নীতি–নিয়ম অনুসৰি বৰাৰ নাম–ঠিকনা পঞ্জীয়ন কৰাৰ লগতে স্বোৱাবৰ নমুনা সংগ্রহ কৰা হয়৷ তেওঁৰ লগতে পত্নী মণিকা বৰাৰো স্বোৱাব সংগ্রহ কৰে স্বাস্থ্য বিভাগৰ লোকে৷ ইয়াৰ পিছতে তেওঁক কোৱাৰেণ্টাইনৰ বাবে প্রেৰণ কৰা হয় ৰেডিচন ব্লু হোটেললৈ৷
শুকুৰবাৰে এক ভিডিঅ’ বার্তাযোগে এই কথা সদৰী কৰি তেওঁ কয় যে লকডাউনৰ বাবে প্রায় ৫৮ দিন ধৰি দিল্লীত আবদ্ধ হৈ পৰিছিল৷ কালি ৰাজধানী এক্সপ্রেছযোগে আহি গুৱাহাটীত উপস্থিত হয়৷ ইপিনে, লকডাউনৰ সময়ত ৰাজ্যবাসীক বিভিন্ন ধৰণে সহায় কৰাৰ বাবে কংগ্রেছ কর্মীসকলক তেওঁ এই বার্তাযোগে ধন্যবাদ জ্ঞাপন কৰে৷