উৎপল কুমাৰ কলিতা
আমাৰ মাটিতে সোণ আছে৷ পথাৰবোৰ আমাৰ সোণৰ খনি৷ কেৱল আমি পথাৰৰ পৰা সোণ আহৰণ কৰিব পাৰিব লাগিব, জানিব লাগিব, চেষ্টা কৰিব লাগিব৷ আমাৰ পথাৰবোৰৰ পৰাই আমি আমাৰ অর্থনীতি সলনি কৰিব পাৰোঁ৷ –এই মন্তব্য কমল কুমাৰী বড়োৰ৷ এটা অঞ্চলৰ ছয় শতাধিক মহিলাক লগত লৈ গ্রাম্য অর্থনীতিৰ ভেটি নির্মাণৰ এক সংগ্রাম গঢ়ি তুলিছে এইগৰাকী উদ্যমী নাৰীয়ে৷ যি সংগ্রামে সলনি কৰিছে বহু পৰিয়ালৰ অর্থনৈতিক জীৱন চিত্র৷ শোণিতপুৰ জিলাৰ বৰছলা সমষ্টিৰ পুঠিমাৰী গাঁৱৰ বাসিন্দা কমল কুমাৰী বড়ো নিজেও আজি পৰিচিত হৈ পৰিছে ৰাজ্যৰ অগ্রণী মহিলা কৃষক হিচাপে৷
কৃষক পৰিয়ালৰ জীয়ৰী তথা কৃষক পৰিয়ালৰ বোৱাৰী কমল কুমাৰী বড়োৰ শৈশৱৰ পৰাই কৃষি কর্মৰ প্রতি আছিল ধাউতি৷ নিজে ৰোৱা–তোলা সকলো কামতে পার্গত আছিল৷ নিজস্ব প্রচেষ্টাত তেওঁ কেইবাবছৰ ধৰি নিজৰ তাকৰীয়া মাটিত খেতিও কৰিছিল৷ কিন্তু তেওঁৰ হেঁপাহ আছিল অধিক মহিলাক জড়িত কৰি কৃষি কার্যক এক বৈপ্লৱৰ ৰূপ দিয়া৷ এই লৈ তেওঁ কামত লাগি পৰিছিল৷ এই সংগ্রামৰ পাতনি সম্পর্কত কমল কুমাৰী বড়োৱে কয়– ‘শৈশৱৰ পৰাই আমি বোকা মাটিৰ লগত ডাঙৰ হৈছোঁ৷ কৃষি কর্মই আমাৰ জীৱন৷ কিন্তু বর্তমান সময়ত কৃষি কর্মৰ প্রতি গ্রামাঞ্চলত অনীহা দেখা গৈছে৷ মাটিবোৰ এনেয়ে পৰি থাকে৷ এনে অৱস্থাত মই নাৰী সমাজক কৃষিক্ষেত্রলৈ আগুৱাই আনি এক অর্থনৈতিক বিপ্লৱ সূচনা কৰাৰ প্রয়াস কৰিলোঁ৷ যিহেতু আমাৰ নাৰী সমাজে কষ্ট কৰিব পাৰে, অসীম ধৈর্য আৰু একাগ্রতা আছে, সেয়ে এইক্ষেত্রত সফল হ’ম বুলি ধাৰণা কৰিলোঁ৷ অসমত সমবায়ভিত্তিক কৃষি কর্ম পূর্বৰে পৰা প্রচলিত৷ এনে সংগঠিত কৃষি কর্মই সফলতা লাভ কৰে আৰু চৰকাৰীভাৱেও এইক্ষেত্রত সহায়–সহযোগিতা পোৱা যায়৷’
এই লৈয়ে কৃষি বিভাগৰ পৰা যাৱতীয় সহায় আৰু পৰামর্শ লৈ ২০২১ চনৰ ১৩ অক্টোবৰত তেওঁ বিশগৰাকী মহিলাক লৈ আৰম্ভ কৰিলে ‘জয়মতী কৃষক উৎপাদক কোম্পানী৷’ প্রথম অৱস্থাত তেওঁলোকে সংঘবদ্ধভাৱে কৃষি কর্মত নামি পৰিল৷ কমল কুমাৰী বড়োৱে গোটটোৰ অধ্যক্ষাৰ দায়িত্ব গ্রহণ কৰিলে৷ লাহে লাহে গোটৰ সদস্যা বাঢ়ি গৈ থাকিল৷ গোটৰ সদস্যাসকল পাৰিবাৰিক কৃষিভূমিৰ লগতে কিছু পতিত মাটিত তেওঁলোকে কৃষি কর্ম আৰম্ভ কৰিলে৷ এইক্ষেত্রত কমল কুমাৰী বড়োৱে মহিলাসকলক কিদৰে উলিয়াই আনিলে সেই সম্পর্কে প্রকাশ কৰা অনুসৰি– ‘মহিলাসকলক কৃষি কর্মলৈ উলিয়াই অনাত প্রথমতে কিছু সমস্যাৰ সৃষ্টি হৈছিল৷ আমাৰ প্রায়ভাগ মহিলাৰ স্বাৱলম্বী মন আছে৷ কিন্তু পৰিয়ালে কি কয়, সমাজে কি কয় তাক ভাবি পিছপৰি থাকে৷ এইক্ষেত্রত মহিলাসকলক যথেষ্ট বুজাব লগা হৈছিল৷ কিন্তু লাহে লাহে মহিলাসকলে বুজি পাই নিজস্বভাৱে কিবা এটা কৰিবৰ বাবে আগবাঢ়ি আহিল৷ প্রথমতে বিশগৰাকী মহিলাৰে কাম আৰম্ভ কৰিছিলোঁ৷ পৰৱর্তী সময়ত সদস্যাৰ সংখ্যা কম সময়তে চাৰি শতাধিক হ’ল৷ বর্তমান জয়মতী কৃষক উৎপাদক কোম্পানীত প্রায় কুৰিখন গাঁৱৰ ৬৫০গৰাকী সদস্যা অন্তর্ভুক্ত হৈ আছে৷ ইয়াৰ প্রায়সকল মহিলা, যুৱতীয়ে নিজৰ নিজৰ মাটি কোম্পানীক কৃষি কর্মৰ বাবে দিছে৷ আমাৰ কোম্পানীত বর্তমান বহু উচ্চশিক্ষিত মহিলা আৰু যুৱতীয়ে যোগ দি কাম কৰি আছে৷’ ২০২১ বর্ষৰ তেওঁলোকে পৰম্পৰাগত জ্ঞানেৰে কৃষি কর্ম কৰি বৃহৎ সফলতা লাভ কৰা নাছিল৷ পৰৱর্তী সময়ত তেওঁলোকে বিভাগীয়ভাৱে প্রশিক্ষণ লৈ উন্নত প্রযুক্তি ব্যৱহাৰৰ দ্বাৰা অধিক লাভ অর্জন কৰে৷ জিলা কৃষি বিভাগ, কৃষি বিজ্ঞান কেন্দ্র আৰু এপার্টৰ পৰামর্শ আৰু সহযোগত কৃষি কর্ম কৰি ২০২২ বর্ষত তেওঁলোকে ২৫ লাখ টকা উপার্জন কৰে৷ বিপৰীতে ২০২৩ বর্ষত তেওঁলোকৰ উপার্জন এক কোটি আৰু ২০২৪ বর্ষত ডেৰ কোটি অতিক্রম কৰে৷ ২০২৫ বর্ষত দুই কোটি টকা উপার্জনৰ লক্ষ্য ৰাখিছে কমল কুমাৰী বড়োৰ নেতৃত্বত জয়মতী কৃষক উৎপাদক কোম্পানীয়ে৷
ইতিমধ্যে জয়মতী এফপিচিয়ে শোণিতপুৰৰ ব্রহ্মপুত্রৰ পাৰৰ বোৱলগুৰি পথাৰ, বাউনি চাপৰিত দলে–বলে প্রায় ৫ হাজাৰ বিঘা কৃষিভূমি সামৰি কৃষি কর্ম কৰি আছে৷ কোম্পানীৰ অধীনত ২০০০ বিঘা মাটিত সৰিয়হ, ২৫৭ বিঘা মাটিত আলু, ১০০ বিঘা মাটিত মাটিমাহ, ১৫০০ বিঘা মাটিত ৰঙালাউ, ৪০ বিঘা মাটিত মটৰ মাহ আৰু প্রায় ৫০ বিঘা মাটিত মাকৈ খেতি কৰি আশাপ্রদ উৎপাদন পাবলৈ সক্ষম হৈছে৷ ইয়াৰে প্রায়ভাগ মাটিত ধান খেতি কৰাৰ পাছত এইবোৰ শস্যৰ খেতি শস্যাৱর্তন পদ্ধতিত কৰা হয়৷ তেওঁলোকে ৰঙালাউৰ পৰাই ৯০ লাখ উপার্জন কৰাৰ সম্ভাৱনা আছে৷ তেওঁলোকৰ উৎপাদিত ফচল অসমৰ বিভিন্ন বজাৰৰ লগতে পশ্চিমবংগ, ত্রিপুৰা আদি ৰাজ্যলৈও প্রেৰণ কৰা হৈছে৷ আনহাতে, উৎপাদিত সৰিয়হ তেওঁলোকে সৰিয়হ হিচাপে বিক্রী নকৰি মিঠাতেল উলিয়াই জয়মতী খাটি সৰিয়হ তেল হিচাপে বজাৰত বিক্রী কৰি আছে৷ তেওঁলোকে কৃষি বিজ্ঞান কেন্দ্র আৰু এপার্টৰ সহযোগত কম সময়তে অধিক মাটিত শস্যৰ খেতি কৰিব পৰা আধুনিক প্রযুক্তি ব্যৱহাৰ কৰি আছে৷ ধান কটা, মৰণা মৰা, সৰিয়হ সিঁচা, আলুৰ বীজ সিঁচা সকলো কাম যন্ত্রই সমাধা কৰে৷ ইয়াৰ জৰিয়তে তেওঁলোকে তেওঁলোকৰ মানৱ শক্তিৰ তুলনাত অধিক মাটি সামৰিব পাৰিছে৷ কমল কুমাৰী বড়োই নিজেই ট্রেক্টৰ আৰু প্রযুক্তিগত যন্ত্রবোৰ চলায়৷ ইতিমধ্যে স্থানীয় বিধায়ক পুঁজিৰ সহায়ত তেওঁলোকে এটা স্থায়ী কার্যালয়ো নির্মাণ কৰিছে৷ তেওঁলোকে ভৱিষ্যতে মিঠাতেলৰ এটা উদ্যোগ গঢ়াৰো পৰিকল্পনা কৰিছে৷ কমল কুমাৰ বড়োৰ নেতৃত্বত সৃষ্টি এই কর্ম বিপ্লৱৰ অংশীদাৰ হৰিমায়া দেৱী, দীপা দাস, ৰঞ্জু দাস, কল্পনা বৰুৱা, দীপা বড়ো, নৱমী বড়ো আদি মহিলাই কয়– আমি তেজ, ঘাম পেলাই আজি কমল কুমাৰী বড়োৰ নেতৃত্বত এই সফলতা লাভ কৰিছোঁ৷ আজি আমি একোগৰাকী সফল কৃষক হিচাপে নিজক লৈ গৌৰৱ অনুভৱ কৰোঁ৷ পুৱতি নিশাই শোৱাপাটী এৰি ঘৰৰ সকলো কাম–বন কৰি আমি পথাৰলৈ ওলাই আহোঁ৷ আজি আমি স্বাৱলম্বী হিচাপে গৌৰৱ কৰোঁ৷ অসমৰ নাৰী সমাজ, কৃষক সমাজৰ বাবে কমল কুমাৰী বড়োৰ এই প্রয়াস নিশ্চিতভাৱে এক আদর্শ৷ ইতিমধ্যে এই আদর্শৰ বাবে তেওঁ ৰাষ্ট্রীয় পর্যায়ত ‘অটল গৌৰৱ বঁটা’, ‘প্রাগ প্রেৰণা এৱার্ড’কে ধৰি জিলা আৰু ৰাজ্যিক পর্যায়তো কেবাটাও কৃষি আৰু উদ্যমিতা বঁটা লাভ কৰিছে৷
ফোন : ৯৩৯৪৯–২২৫২৭