নিয়মীয়া বাৰ্তা, ১৬ মাৰ্চ: গোলাঘাট নগৰৰ পাঁচআলিত ভয়ংকৰ অগ্নিকাণ্ডৰ ঘটনা সংঘটিত হয় ৷ প্ৰায় এঘাৰখন ব্যৱসায়ীক প্ৰতিষ্ঠানৰ লগতে এটা ঘৰ সম্পূৰ্ণৰূপে জুইত জাহ যায় ৷ অগ্নিকাণ্ড সংঘটিত হোৱাৰ পিছতেই ততাতৈয়াকৈ ঘটনাস্থলীত গোলাঘাট, নুমলীগড় আৰু দেৰগাঁও অগ্নিনিৰ্বাপক বাহিনী উপস্থিত হয় যদিও বহু ঘণ্টাৰ পিছতহে অগ্নি নিৰ্বাপিত কৰিবলৈ সক্ষম হয় ৷ পাঁচআলিৰ মৃদুল বৰাৰ বাসগৃহটো জুইত সম্পূৰ্ণৰূপে জাহ যোৱাৰ লগতে এখন মহিন্দ্ৰা মাৰাজো গাড়ী আৰু এখন বাইকৰ লগতে কোটি টকাৰ সা-সম্পতি সম্পূৰ্ণৰূপে ভস্মীভূত হয় ৷ পৰিস্থিতিৰ বুজ ল’বলৈ ঘটনাস্থলীত গোলাঘাট জিলাৰ উপায়ুক্ত মৃগেশ নাৰায়ণ বৰুৱা উপস্থিত হৈ ঘটনাৰ বুজ লয় ৷ উল্লেখ্য যে কি কাৰনত অগ্নিকাণ্ড সংঘটিত হ’ল জানিব পৰা হোৱা নাই যদিও স্থানীয় লোকৰ একাংশৰ মতে মৃদুল বৰাৰ ঘৰৰ পৰাই অগ্নিকাণ্ড সংঘটিত হোৱাৰ কথা উল্লেখ কৰে ৷ উল্লেখ্য যে দিন-দুপৰতে গোলাঘাটৰ পাঁচআলিত অগ্নিকাণ্ড সংঘটিত হোৱাৰ পিছতেই নগৰখনত একপ্ৰকাৰ হাহাকাৰ পৰিস্থিতিৰ সৃষ্টি হয় ৷