নিয়মীয়া বাৰ্তা, ৮ এপ্ৰিল : চিৰাঙৰ বাসুগাঁও চহৰত আজি পুৱাৰ ভাগত এক বিধ্বংসী অগ্নিকাণ্ড ঘটনা সংঘটিত হয় । চহৰৰ মুখ্যপথৰ ঘনবসতি এলেকাৰ ব্যৱসায়িক প্ৰতিষ্ঠানত সংঘটিত হয় এই অগ্নিকাণ্ড । অগ্নিকাণ্ডৰ ফলত গৌতম সাহাৰ গেলামাল দোকান আৰু আছাৰুদ্দিন শ্বেখৰ লেপ তুলিৰ দোকান সম্পূৰ্ণ ৰূপে ভস্মীভূত হোৱাৰ লগতে বাকী কেইবাখনো ব্যৱসায়িক প্ৰতিষ্ঠান আৰু বাসগৃহ আংশিকভাৱে ক্ষতিগ্রস্ত হয় । অগ্নিনিৰ্ব্বাপণ বাহিনীৰ গাড়ী অহাৰ আগতেই স্থানীয় লোকসকলৰ তৎপৰতাত জুই কিছু নিয়ন্ত্ৰণত কৰিবলৈ সক্ষম হয় । পিছত অগ্নিনিৰ্ব্বাপণ বাহিনীৰ লোক আহি জুই নিৰ্ব্বাপণ কৰে । উল্লেখ যে বাসুগাঁও চহৰত অগ্নিনিৰ্ব্বাপন বাহিনীৰ আস্থান নথকাৰ বাবে কাজলগাঁৱৰ পৰা এক ঘন্টা পিছত অগ্নিনিৰ্ব্বাপন বাহিনীৰ বাহন আহি জুই নিৰ্বাপিত কৰে । স্থানীয় লোকৰ সন্দেহ লেপ তুলিৰ দোকানী আছাৰুদ্দিন শ্বেখৰ দোকানত বৈদ্যুতিক শ্বৰ্ট চাৰ্কিটৰ পৰাই আজিৰ এই অগ্নিকাণ্ডৰ সূত্ৰপাত হৈছে । আজিৰ এই অগ্নিকাণ্ডৰ ফলত দহ লক্ষাধিক টকা মূল্যৰ সা-সম্পত্তি জুইত যায় ।
প্ৰেৰক ভৃগু মুনি ৰায়