বিশেষ বাৰ্তা, ১৯ মেঃ চাহ বাগিচাৰ একাংশ কৰ্তৃপক্ষই শ্ৰমিকক কঢ়িয়াবৰ বাবে পিক আপ ভান ব্যৱহাৰ কৰাৰ পৰিণতিত আজি মৰিয়নিৰ সমীপত সংঘটিত হয় এক ভয়াবহ পথ দুৰ্ঘটনা । মৰিয়নিৰ নকছাৰীৰ সমীপৰ খাটিসোনা অঞ্চলত মৰিয়নি আমগুৰি ধোদৰ আলিত সংঘটিত হয় এই দুৰ্ঘটনা । ঘটনাৰ সন্দৰ্ভত জানিব পৰা মতে, মৰিয়নিৰ সমীপৰ ভেলাগুৰি চাহ বাগিচাৰ পৰা দিহিঙীয়াপাৰ চাহ বাগিচালৈ শ্ৰমিক কঢ়িয়াই অনা এ এছ ০৩ – বিচি- ১৮৮৩ নম্বৰৰ ব’লেৰ’ পিক আপ বাহনখন পথৰ ওপৰতে বাগৰি পৰে । উল্লেখযোগ্য যে, দিহিঙীয়াপাৰ চাহ বাগিচাৰ পৰা ভেলাগুৰি চাহ বাগিচালৈ দৈনিক এইদৰে বহুসংখ্যক শ্ৰমিকক কঢ়িয়াই কামলৈ নিয়া হয় । আজি কামৰ শেষত শ্ৰমিকসকলক দিহিঙীয়াপাৰ বাগিচালৈ লৈ আনোতে এই ঘটনা ঘটে । বিয়লি প্ৰায় ৫-৪৫ মান বজাত খাটিসোনা তিনি আলিৰ সমীপত পথৰ ওপৰতে পিক আপ বাহনখন বাগৰি পৰে । ফলত বাহনখনত থকা পুৰুষ – মহিলা সমন্বিতে প্ৰায় ৩৫ গৰাকী শ্ৰমিকৰ প্ৰায় সকলোৱেই কম বেছি পৰিমাণে আঘাত প্ৰাপ্ত হয় । ইয়াৰে ৩০ জন মান লোক গুৰুতৰভাৱে আঘাত প্ৰাপ্ত হয় । তেওঁলোকক স্থানীয় লোকে উদ্ধাৰ কৰে । আনহাতে, মৰিয়নি আৰু দেবেৰাপাৰৰ আৰক্ষীও ঘটনাস্থলীত উপস্থিত হৈ উদ্ধাৰ কাৰ্য্যত সহযোগ কৰে । পিছত আহত সকলোকে এম্বুলেন্সৰ সহায়ত চুঙী লাহিঙত অৱস্থিত মহাত্মা গান্ধী আদৰ্শ চিকিৎসালয়লৈ লৈ যোৱা হয় । কিন্তু ইয়াৰে ২৮ গৰাকী লোকৰ অৱস্থা সংকটজনক হোৱাত তেওঁলোকক উন্নত চিকিৎসাৰ বাবে ততাতৈয়াকৈ যোৰহাট চিকিৎসা মহাবিদ্যালয়লৈ প্ৰেৰণ কৰা হয় । ইয়াৰে দেবু চাহু নামৰ পুৰুষ আৰু ইলিয়া তানপুৰীয়া নামৰ মহিলা শ্ৰমিক দুগৰাকীৰ অৱস্থা অধিক সংকটজনক বুলি জানিব পৰা গৈছে । ১০৮ মৃত্যুঞ্জয় সেৱাৰ দহখনৰো অধিক এম্বুলেন্সে আহত লোকসকলক মহাত্মাগান্ধী আদৰ্শ চিকিৎসালয়ৰ পৰা যোৰহাট চিকিৎসা মহাবিদ্যালয়লৈ কঢ়িয়ায় । দুৰ্ঘটনাৰ কাৰণ জানিব পৰা হোৱা নাই যদিও তীব্ৰ গতিৰ বাবেই দুৰ্ঘটনাটো ঘটিবলৈ পালে বুলি প্ৰত্যক্ষদৰ্শীয়ে জানিবলৈ দিছে । উল্লেখযোগ্য যে, চাহ বাগিচাসমূহত অস্থায়ী শ্ৰমিক যোগান ধৰা একাংশ ঠিকাদাৰে এইদৰে অধিক লাভৰ আশাত শ্ৰমিকসকলক গৰু ছাগলীৰ দৰে মালবাহী বাহনত অতি বিপজ্জনকভাৱে অনা নিয়া কৰি আহিছে । আজিৰ ঘটনাও তেনে কাৰণতে সংঘটিত হ’বলৈ পালে স্থানীয় ৰাইজে অভিযোগ উত্থাপন কৰিছে । লক্ষণীয় যে, মৰিয়নি আৰক্ষী থানাৰ লগতে দেবেৰাপাৰ আৰক্ষী চকীৰ সন্মুখেৰেই এইদৰে পিক আপ বাহনত শ্ৰমিক কঢ়িয়াই অনা নিয়া কৰিয়েই আছে । কিন্তু এইবোৰক লৈ কোনো ব্যৱস্থা গ্ৰহণ কৰা আজিকোপতি পৰিলক্ষিত হোৱা নাই । ইয়াৰ পিছত আৰক্ষী বা প্ৰশাসনে কি ব্যৱস্থা গ্ৰহণ কৰে সেয়া লক্ষণীয় হ’ব ।
প্ৰেৰক দিব্যজ্যোতি শইকীয়া