নিয়মীয়া বাৰ্তা, ১ জুনঃ কামৰূপ জিলা পৰিবহণ বিষয়াৰ কাৰ্যালয়ৰ মটৰ পৰিবহণ পৰিদৰ্শক ভূপেন শইকীয়াই কালি চাকৰিৰ পৰা অৱসৰ গ্ৰহণ কৰে। শইকীয়াৰ অৱসৰ উপলক্ষে কালি কামৰূপ জিলা পৰিবহণ বিষয়াৰ কাৰ্যালয়ৰ প্ৰেক্ষাগৃহত কাৰ্যালয়ৰ কৰ্মচাৰীসকলে মিলি এখন বিদায় সম্বৰ্ধনা সভাৰ আয়োজন কৰে। জিলা পৰিবহণ বিষয়া ৰূপজ্যোতি কলিতাৰ সঞ্চালনাত হোৱা বিদায় সম্বৰ্ধনা সভাত শইকীয়াক কৰ্মচাৰীসকলে উষ্ম সম্বৰ্ধনা জনায়। জিলা পৰিবহণ বিষয়াগৰাকীয়ে শইকীয়াৰ কৰ্মজীৱনত পোৱা সহায় সহযোগিতাৰ শলাগ লোৱাৰ লগতে তেওঁৰ কৰ্মজীৱনৰ নিয়মানুবৰ্তিতা আৰু কৰ্মদক্ষতাৰো প্ৰশংসা কৰে। আনহাতে তেওঁৰ সহযোগী পৰিদৰ্শক অচিন্ত সেন আৰু সত্যকাম গগৈয়েও তেওঁলোকৰ ভাষণত শইকীয়াৰ কৰ্মদক্ষতা আৰু সহযোগীতাৰ কথা শ্ৰদ্ধাৰে সোঁৱৰণ কৰে। বিদায়ী পৰিদৰ্শক শইকীয়াই তেওঁৰ বিদায়ী ভাষণত কৰ্মজীৱনৰ অভিজ্ঞতাৰ কথা বৰ্ণনা কৰি আৱেগিক হৈ পৰে। কাৰ্যালয়ৰ কৰ্মচাৰীসকলে তেওঁক ফুলাম গামোচা, জাপি ,শৰাই, ফুলৰ থোপা আদিৰে বিদায় সম্বৰ্ধনা জনাই তেওঁলোকো আবেগিক হৈ পৰে। সভাত স্থানীয় সাংবাদিক সংগঠন নৰ্থ গুৱাহাটী জাৰ্ণেলিষ্ট ফ’ৰামৰ হৈ সম্পাদক কৌশিক দাসে , নিতোপম মেধি, লক্ষী ডেকা আদিয়ে বিষয়াগৰাকীক ফুলাম গামোচা, জাপি শৰাইৰে সম্বৰ্ধনা জনায়। তদুপৰি স্থানীয় ব্যৱসায়িক প্ৰতিষ্ঠান কিছুমানেও বিষয়া গৰাকীক ফুলাম গামোচা, জাপি, শৰাই আদিৰে উষ্ম সম্বৰ্ধনা জনাই।
প্ৰেৰক মুনীন ডেকা