নিয়মীয়া বাৰ্তা, ১৬ জুন : কেইবাদিনো ধৰি অব্যাহত থকা মুষলধাৰ বৰষুণৰ ফলত ফেনে-ফোটোকাৰে বাঢ়ি অহা জৰাসৰ নৈয়ে আজি বুৰাই পেলায় বালিপৰাৰ বিস্তীৰ্ণ অঞ্চল । জৰাসৰ নৈৰ বানত বুৰ যায় বালিপৰাৰ দীঘলী বালিজান, উদমাৰী গাঁও, কমাৰীগাঁও, এৰাগাঁও । প্ৰশাসন আৰু এন ডি আৰ এফে কেইবাখনো নাৱেৰে চলাই উদ্ধাৰ অভিযান । আনহাতে বালিপৰা-লখিমপুৰ সংযোগী ১৫ নং ৰাষ্ট্ৰীয় ঘাইপথৰ ওপৰেদি বাগৰিছে বান । ফলত পথটোত সৃষ্টি হৈছে ব্যাপক যান-জঁট । লগতে বানত বুৰিল বালিপৰা প্ৰাথমিক স্বাস্থ্য কেন্দ্ৰ, কমাৰীগাঁও প্ৰাথমিক বিদ্যালয়, বালিপৰা বিদ্যুৎ সংমণ্ডল কাৰ্যালয়, বালিপৰা আই বি ইত্যাদি ।