নিয়মীয়া বাৰ্তা, ৩০ জুলাইঃ বঙাইগাঁও জিলাৰ যোগীঘোপাৰ ব্যক্তিগত খণ্ডৰ অগ্ৰণী শিক্ষানুষ্ঠান জ্ঞানপীঠ জাতীয় বিদ্যালয়ত আজি কবিতা আবৃতিৰ এক কৰ্মশালা অনুষ্ঠিত হয় । বিদ্যালয়খনৰ শিক্ষাৰ্থী সকলক পাঠ্যপুথিৰ শিক্ষাৰ সমান্তৰালভাবে সাহিত্য-সংস্কৃতিৰ ক্ষেত্ৰখনতো সমানে আগবঢ়াই নিয়াৰ লক্ষ্যৰে বিদ্যালয় খনত এই কৰ্মশালাৰ আয়োজন কৰা হয় । বিদ্যালয়খনৰ সচিব খাদেমুল হুছেইনে পৰিচালনা কৰা কৰ্মশালাত সমল ব্যক্তি হিচাপে উপস্থিত থাকে বিশিষ্ট কবি, লেখিকা তথা অভয়াপুৰী মহাবিদ্যালয়ৰ অৱসৰপ্ৰাপ্ত অধ্যাপিকা ড° মৰমী বৰঠাকুৰ তালুকদাৰ আৰু বিশিষ্ট কবি তথা আবৃতিকাৰ ৰাধিকা মোহন দাস । কৰ্মশালাখনত বিশেষকৈ আবৃত্তিৰ সময়ত উচ্চাৰণ, বিভিন্ন শব্দৰ গঠন, বিভিন্ন শব্দৰ কথনভংগী, কণ্ঠ নিয়ন্ত্ৰণ আদিৰ ওপৰত মনোযোগ প্ৰদান কৰা হৈছিল। কৰ্মশালাত বিদ্যালয়খনৰ বহুসংখ্যক ছাত্ৰ-ছাত্ৰী , শিক্ষক-শিক্ষয়িত্ৰীৰ লগতে বিদ্যালয় পৰিচালনা সমিতিৰ সভাপতি মুছাৰফ হুছেইন, বিত্ত সচিব ৰমনাথ মণ্ডল আৰু অধ্যক্ষ নিখিল দাসেও অংশগ্ৰহন কৰে ।
টিংকু চন্দ্ৰ দাস, যোগীঘোপা