নিয়মীয়া বাৰ্তা, ১৬ অক্টোবৰঃ কেবিনেট মন্ত্ৰী অতুল বৰাই কালি নিজ সমষ্টি বোকাখাতত নৱ নিৰ্মিত তিনিটা অংগনৱাড়ী কেন্দ্ৰ আৰু দুটা প্ৰধানমন্ত্ৰী আৱাস যোজনা গৃহ উদ্বোধন কৰে। অসম চৰকাৰৰ এ আভিলাসী আঁচনি “সোণালী শৈশৱ বিকশিত অসম”ৰ অধীনত মহিলা আৰু শিশু কল্যাণ বিভাগৰদ্বাৰা নতুনকৈ নিৰ্মাণ কৰা ইকৰাজান লেবাৰ ক্লাব, ৰঙাগড়া বনুৱা আৰু জোলোঙা ভেটি আদৰ্শ অংগনৱাড়ী কেন্দ্ৰৰ গৃহ তিনিটা উদ্বোধন কৰে স্থানীয় বিধায়ক তথা জ্যেষ্ঠ কেবিনেট মন্ত্ৰী অতুল বৰাই। নৱনির্মিত অংগনৱাড়ী কেন্দ্ৰৰ গৃহ তিনিটা উদ্বোধন কৰি মন্ত্ৰী বৰাই কয় যে আজিৰ শিশু কাইলৈ দেশৰ ভৱিষ্যৎ। সেয়েহে শিশু অৱস্থাৰপৰাই শিশুসকলৰ সৰ্বাংগীণ বিকাশত আমি সকলোৱে অধিক যত্নবান হোৱাটো প্ৰয়োজন। এইক্ষেত্ৰত অংগনৱাড়ী কেন্দ্ৰসমূহে বিশেষ ভূমিকা গ্ৰহণ কৰিব পাৰে বুলিও কয় মন্ত্ৰী বৰাই।
ইপিনে গোলোংটেমেৰা গাঁও পঞ্চায়তৰ নাককাটি বহিখোৱাগাঁৱৰ হিতাধিকাৰী বিজু পেগু আৰু ওপৰটেমেৰা গাঁৱৰ ৰত্নেশ্বৰ মিলিৰ প্ৰধানমন্ত্ৰী আৱাস যোজনাৰ গৃহ দুটিও শুভ উদ্বোধন কৰে মন্ত্ৰী বৰাই। এই উদ্বোধনী কাৰ্যসূচীত মন্ত্ৰী বৰাক সংগ দিয়ে বোকাখাতৰ মহকুমাধিপতি ডাঃ নেহা যাদৱ, চক্ৰ বিষয়া সৌভিক দত্ত, গোলাঘাট জিলা গ্ৰাম্য উন্নয়ন অভিকৰণৰ প্ৰকল্প সঞ্চালক অবিনাশ শইকীয়া, গোলাঘাট পশ্চিমৰ খণ্ড উন্নয়ন বিষয়া পাৰ্থজিৎ গগৈ, চি ডি পি অ’ প্ৰণৱ বৰা, গাঁও পঞ্চায়ত সভাপতি নৰেন বৰি, পুষ্প পাটগিৰি আৰু জয়ন্তী লিইং, আঞ্চলিক পঞ্চায়তৰ সদস্যা পূৰ্ণিমা দাস, ৰূপালী মৰাং, পঞ্চায়তৰ ৱাৰ্ড সদস্য-সদস্যা স্থানীয় ৰাইজ।