নিয়মীয়া বাৰ্তা, ২৯ অক্টোবৰ: ৰাজ্যৰ আন আন প্ৰান্তৰৰ লগতে আজি মৰিগাঁৱতো ছহিদ দিৱস উদযাপন কৰে মৰিগাঁও আৰক্ষীয়ে। সমাজ তথা দেশৰ প্ৰতিজন নাগৰিকৰ সুৰক্ষা আৰু নিৰাপত্তাৰ বাবে সেৱা আগবঢ়াই নিজৰ প্ৰাণ আহুতি দিয়া আৰক্ষী জোৱান সকলৰ প্ৰতি শ্ৰদ্ধা নিবেদনৰ অৰ্থে অসম আৰক্ষীয়ে উদযাপন কৰা ছহিদ দিৱস উপলক্ষে নৱম আৰক্ষী বেটেলিয়নৰ জোৱানৰ বেণ্ডৰ শব্দৰ মুখৰিত হৈ পৰে মৰিগাঁও চহৰ। ছহিদ দিৱস উপলক্ষে মৰিগাঁও আৰক্ষী জোৱানসকলে মৰিগাঁও চহৰৰ বিহুতলিৰ পৰা আৰক্ষী বেণ্ড বজাই মৰিগাঁও চহৰৰ মূল পথত সমদল উলিয়াই ছহিদ জোৱানলৈ শ্ৰদ্ধাঞ্জলি জ্ঞাপন কৰে। উক্ত অনুষ্ঠানত মৰিগাঁও জিলা আৰক্ষী অধীক্ষক হেমন্ত কুমাৰ দাস, অতিৰিক্ত আৰক্ষী অধীক্ষক সুপ্ৰতিভলাল বৰুৱা, উপ আৰক্ষী অধীক্ষক মৌচুমী দাস, মৰিগাঁও সদৰ থানাৰ ভাৰপ্ৰাপ্ত বিষয়া জ্যোতিপ্ৰসাদ সন্দিকৈকে প্ৰমুখ্যে কৰি ভালেমান আৰক্ষী বিষয়া -জোৱান উপস্থিত আছিল।