নিয়মীয়া বাৰ্তা, ২৯ নৱেম্বৰ: কালার্ছ টিভিৰ নৃত্যৰ ৰিয়েলিটী শ্ব’ ঝলক দিখলা জা–১০ৰ এই ছিজনৰ বিজয়ী মুকুট পৰিধান কৰিলে অসমৰ শিশু প্রতিভা গুঞ্জন সিন্হাই৷ ৰাজ্যবাসীক গৌৰৱান্বিত কৰি কালি গুঞ্জন সিন্হাই তেওঁৰ নিকটতম প্রতিদ্বন্দ্বী ৰুবিনা দিনাইক আৰু ফৈচন শ্বেখক পিছ পেলাই এই ট্রফী দখল কৰিবলৈ সক্ষম হয়৷ ঝলক দিখলা জা–১০ ট্রফীৰ লগতে গুঞ্জন সিন্হাই লাভ কৰে ২০ লাখ টকাৰ নগদ পুৰস্কাৰ৷ উল্লেখ্য যে ২০১৪ চনত জন্মলাভ কৰা গুঞ্জন গুৱাহাটীৰ বাসিন্দা৷ গুঞ্জনৰ পিতৃ এগৰাকী আৰক্ষী বিষয়া৷ গুঞ্জনে ৰিয়েলিটী শ্ব’ত অভিষেক ঘটাইছিল ডান্স দীৱানে ছিজন–৩ৰ জৰিয়তে৷ কিন্তু এই শ্ব’ত সফল হ’ব পৰা নাছিল৷ ইফালে ১৬ সপ্তাহ ধৰি শ্ব’ত ব্যস্ত থকা গুঞ্জনে এই ট্রফী লাভ কৰি উৎসাহিত হৈ পৰিছে৷ এক দীঘলীয়া সময় বিদ্যালয়ৰ পাঠদানৰ পৰা বঞ্চিত ৮ বছৰীয়া গুঞ্জনে অনলাইনযোগে বিদ্যালয়ৰ পাঠ গ্রহণ কৰি থকাৰ কথা উল্লেখ কৰে৷ এই সাফল্যৰ পাছত মই এতিয়া নিয়মীয়াকৈ বিদ্যালয়ত উপস্থিত থাকিম৷ –গুঞ্জনে কয়৷ কালি নিশা গুঞ্জনক শীর্ষ বিজয়ৰ মুকুট পিন্ধাই দিয়ে মোহময়ী অভিনেত্রী মাধুৰী দীক্ষিত, প্রখ্যাত চলচ্চিত্র নির্মাতা কৰণ জোহৰ আৰু অভিনেত্রী নৃত্যবিদ ন’ৰা ফাতেহিয়ে৷