নিয়মীয়া বাৰ্তা, ২৬ ডিচেম্বৰ: নুমলীগড় তেল শোধনাগাৰৰ সামাজিক উন্নয়ন পুঁজি আঁচনিৰ ৩ কোটি টকাৰে বোকাখাতত স্থাপন হ’ব লগা মুকলি প্ৰেক্ষাগৃহটোৰ আজি শিলান্যাস কৰে স্থানীয় বিধায়ক তথা জ্যেষ্ঠ কেবিনেট মন্ত্ৰী অতুল বৰাই ৷ বোকাখাত উচ্চতৰ মাধ্যমিক বিদ্যালয়ৰ বৃহৎ ভূমি সামৰি স্থাপন হ’ব লগা বৃহৎ প্ৰক্ষাগৃহটোত ১২ শৰো অধিক লোক বহিব পাৰিব ৷ সোমবাৰে বিদ্যালয়খনত উপস্থিত হৈ ভূমি পূজনৰ লগতে শিলান্যাস কৰে মন্ত্ৰী অতুল বৰাই ৷ অহা ২০২৩ বৰ্ষৰ এপ্ৰিলৰ ২৫ তাৰিখে নুমলীগড় তেল শোধনাগাৰৰ প্ৰতিষ্ঠা দিৱসৰ দিনাই মুকলি প্ৰেক্ষাগৃহটি উন্মোচনৰ দিন ধাৰ্য কৰি লৈছে শোধনাগাৰ কতৃপক্ষই ৷ আজিৰ শিলান্যাস অনুষ্ঠানত নুমলীগড় শোধনাগাৰৰ সামাজিক উন্নয়নৰ বিভাগৰ সঞ্চালক কাজল শইকীয়া, আন দুগৰাকী বিষয়া ক্ৰমে বিশ্বজিৎ বৰা, মিন্টু সন্দিকৈ উপস্থিত থাকে ৷ নুমলীগড় শোধনাগাৰৰ এনে পদক্ষেপক মন্ত্ৰী অতুল বৰাই আদৰণি জনোৱাৰ লগতে শোধনাগাৰ কতৃপক্ষই ভৱিষ্যতৰ দিনত এনেধৰণৰ জনহিতকৰ কাম কৰি যাব বুলি আশা কৰে ৷ ইফালে নুমলীগড় শোধনাগাৰে সামাজিক উন্নয়ন পুঁজিৰ জৰিয়তে বোকাখাত মহকুমাৰ লগতে গোলাঘাট জিলাত শিক্ষা, স্বাস্থ্যখণ্ডত জনহিতকৰ কাম কৰি যাব বুলি কাজল শইকীয়াই জানিবলৈ দিয়ে ৷ বোকাখাত নগৰৰ কাষতে থকা বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যানলৈ পৰ্যটকৰ আগমণৰ প্ৰতি লক্ষ্য ৰাখি বোকাখাতক পৰ্যটন নগৰী হিচাবে গঢ়ি তোলাৰ ক্ষেত্ৰতো বিশেষ পদক্ষেপ গ্ৰহণ কৰিব শোধনাগাৰ কতৃপক্ষই ৷ ইয়াৰ পিছতে মন্ত্ৰী গৰাকীয়ে বোকাখাতৰ সাপজুৰি সাপ্তাহিক বজাৰত নাৱাৰ্ডৰ পুঁজিৰে নিৰ্মাণ কৰা এটা সুন্দৰ বজাৰ গৃহ উন্মোচন কৰাৰ লগতে বোকাখাত বি ডি এম পথৰ কাষতে থকা চৰকাৰী ফিচাৰীৰ উন্নয়নৰ বাবে অসম কৃষি-বাণিজ্য আৰু গ্ৰাম্য ৰূপান্তৰকৰণ প্ৰকল্প (আপাৰ্ট) ৰ আঁচনিৰ অধীনত ৭৫ লাখ টকা ব্যয় সাপেক্ষে নিৰ্মাণ হ’ব লগা বোকাখাত মীনপামৰ পৌনিক মাছ পোনা উৎপাদন কেন্দ্ৰ আৰু চৌহদৰ পকী বেৰা কামৰ আধাৰশিলা স্থাপন কৰে ৷