নিয়মীয়া বাৰ্তা, ৫ ফেব্ৰুৱাৰীঃ দৰঙামেলা আৰক্ষী চকীৰ অন্তর্গত পাটকীজুলি বজাৰৰ পৰা কালি আৰক্ষীয়ে জালনোটসহ দুজন লোকক আটক কৰিবলৈ সক্ষম হয়৷ দৰঙামেলা আৰক্ষী চকীৰ ভাৰপ্রাপ্ত বিষয়া ডেৰচুন নার্জাৰীয়ে সদৰী কৰা মতে মঙলবাৰে পুৱা এটা গোপন সূত্রই জনায় যে ভূটান সীমান্তৰ পাটকীজুলি সাপ্তাহিক বজাৰত দুজন লোকে জালনোটৰ সৰবৰাহ কৰি আছে৷ খবৰ লাভ কৰাৰ লগে লগে আৰক্ষী বিষয়াগৰাকীয়ে পাটকীজুলি সাপ্তাহিক বজাৰত অভিযান চলায়৷ পাঁচশ টকীয়া জালনোটেৰে সামগ্রী কিনি থকা সময়ত দুজন লোকক হাতে–লোটে আটক কৰিবলৈ সক্ষম হয়৷
ধৃত লোক দুজন দৰংগামেলা আৰক্ষী চকীৰ অন্তর্গত এন কে দৰঙাৰ চাফৰ আলীৰ পুত্র ইছলাম আলী আৰু একে গাঁৱৰে হাফিছ উদ্দিনৰ পুত্র জাকিৰ আলী ৷ ধৃত দুয়োজনৰ পৰা আৰক্ষীয়ে ৭খন পাঁচশ টকীয়া জালনোট উদ্ধাৰ কৰিবলৈ সক্ষম হয়৷