নিয়মীয়া বাৰ্তা, ২৩জানুৱাৰী: ছুপাৰষ্টাৰ শ্বাহৰুখ খানৰ শেহতীয়া বহুকেইখন চলচ্চিত্ৰই বিশেষ জনপ্ৰিয়তা লাভ নকৰাৰ পিছত এইবাৰ অন্য ৰূপত প্ৰকাশ ঘটিছে পাঠানৰ। পাঠান চলচ্চিত্ৰই লাভ কৰিছে বিশেষ প্ৰচাৰ। সমৰ্থন-বিৰোধিতাৰ মাজেৰে মুক্তিৰ আগেয়ে তীব্ৰ চৰ্চাত থকা পাঠানৰ বতাহ লাগিছে অসমতো। পাঠান প্ৰসংগত জুবিন গাৰ্গেও পাঠানৰে সংগতি ৰাখি আগবঢ়ালে মত।
জুবিনে ক’লে- ”এইবাৰ পাঠান ৰিলিজ কৰিব শ্বাহৰুখ খানে, ড০ বেজবৰুৱা-২ ৰিলিজ কৰিম মই, চাওঁ ৰাইজে কোনখন চিনেমা চায় আৰু ৰাইজে কাক ভাল পায়। দৰং জিলাৰ বেজেৰা সমীপৰ দুমুনীচকীৰ পোহৰ নামৰ এন জি অ’ৰ উদ্যোগত বৰনৈ মহাবিদ্যালয়ৰ খেলপথাৰত প্ৰতিষ্ঠা দিৱস উপলক্ষে আমন্ত্ৰিত সংগীতানুষ্ঠানত অংশগ্ৰহণ কৰি জুবিন গাৰ্গে এই মন্তব্য কৰে। সহস্ৰাধিক লোকৰ উপস্থিতিত গীত পৰিৱেশন কৰা অনুষ্ঠানটোত জুবিনে এই কথা কয়। আনহাতে সাংস্কৃতিক অনুষ্ঠানৰ কাৰ্যসূচী মুকলি কৰে অসম চৰকাৰৰ মুখ্যমন্ত্ৰীৰ বিশেষ কৰ্তব্যৰত বিষয়া হেমন্ত চৌধুৰীয়ে। জুবিন গাৰ্গে ইটোৰ পিছত সিটো গীত পৰিৱেশন কৰি শিশুসুলভ কথাৰে মোহাচ্ছন্ন কৰি ৰাখে অগণন শ্ৰোতা-দৰ্শকক।