নিয়মীয়া বাৰ্তা, ১৮ ফেব্ৰুৱাৰীঃ নগাঁও চহৰৰ সমীপৰ মৰঙিয়ালত গাঁওৰক্ষী বাহিনীয়ে যোৱানিশা অভিযান চলাই বুজন পৰিমাণৰ নিচাযুক্ত ঔষধ জব্দ কৰাৰ লগতে দুগৰাকী মহিলাসহ তিনিজন লোকক আটক কৰি স্থানীয় মৰিকলং আৰক্ষীক গতাই দিয়ে৷ ৰাইজৰ সহযোগত গাঁওৰক্ষী বাহিনীয়ে চাইফুল ইছলামৰ ঘৰৰ পৰা বুজন পৰিমাণৰ নিচাযুক্ত ঔষধ জব্দ কৰাৰ লগতে তেওঁৰ পত্নী হাছিনা বেগম, পাৰবিনা বেগম আৰু ৰাজকিশোৰ সিন্হাক আটক কৰে৷
আনহাতে, মূল অভিযুক্ত চাইফুল ইছলাম ঘৰৰ পৰা পলায়ন কৰে৷ ধৃত পাৰবিনা বেগমৰ ঘৰ তেজপুৰৰ ভোজপুৰত আৰু ৰাজকিশোৰৰ ঘৰ বিহাৰৰ চমষ্টিপুৰ জিলাৰ বিৰলী চ’কত৷ ৰাজকিশোৰ কিছুদিন ধৰি চাইফুল ইছলামৰ ঘৰত আশ্রয় লৈ আছিল৷ এইজন লোকে দীর্ঘদিন ধৰি অসমৰ ভিন্ন স্থানৰ লগতে একাধিক বহিঃৰাজ্যত ড্রাগ্ছ, গাঞ্জা আদি নিচাযুক্ত ঔষধ সৰবৰাহ কৰি আহিছে৷