বাৰ্তা ডিজিটেল ডেস্ক, ৪ জানুৱাৰীঃ আজি সন্ধিয়া গ্ৰন্থমেলাৰ বাকৰিত জে এছ পাব্লিকেশ্বনছৰ বিপণীত নিশা ভূঞাই অনুবাদ কৰি উলিওৱা “অশ্বত্থামা” শীৰ্ষক অনুবাদ উপন্যাসখন উন্মোচন কৰা হয়। বিশিষ্ট সাহিত্যিক আশুতোষ গাৰ্গে হিন্দী ভাষাত ৰচনা কৰা এই উপন্যাসখনৰ অসমীয়া অনুবাদ সংস্কৰণটি উন্মোচন কৰে বিশিষ্ট অনুবাদক তথা সাহিত্যিক গংগাপ্ৰসাদ হাজৰিকা আৰু বিপুল দেউৰীয়ে। মহাভাৰতৰ বহু চৰিত্ৰৰ চমকনিৰ বাবেই কিছু চৰিত্ৰ ম্লান হৈ পৰা দেখা যায়। মহাকাব্যখনৰ তেনে এটি চৰিত্ৰ হৈছে অশ্বত্থামা। এই চৰিত্ৰটিক মূল ৰূপে লৈ আশুতোষ গাৰ্গে ৰচনা কৰা এই উপন্যাসখন ইতিমধ্যে নেচনেল বেষ্ট ছেলাৰ ৰূপে চিহ্নিত হৈছে। তদুপৰি উপন্যাসখন ইতিপূৰ্বে মাৰাঠী আৰু গুজৰাটী ভাষালৈ অনূদিত হৈছে । নিশা ভূঞাই অসমীয়া ভাষালৈ অনুবাদ কৰি উলিওৱা এই উপন্যাসখন জে এছ পাব্লিকেশ্বনৰ হৈ প্ৰণৱ হাজৰিকাই প্ৰকাশ কৰি উলিয়াইছে।