নিয়মীয়া বাৰ্তা, ৪ ফেব্ৰুৱাৰী : বৰপেটাৰ আলোপতি চৰ আৰক্ষী থানাৰ অন্তৰ্গত কালাইৰদিয়াত যোৱানিশা সংঘটিত এক অগ্নিকাণ্ডই অঞ্চলটোত তীব্ৰ চাঞ্চল্যৰ সৃষ্টি কৰে । জানিব পৰা মতে, গাঁওখনৰ শ্বহিদ আলীৰ ঘৰত নিশা প্ৰায় ৮ বজাত হঠাৎ জুইৰ সূত্ৰপাত ঘটি মুহুৰ্ততে ভয়ংকৰ ৰূপ ধাৰণ কৰি পৰিয়ালটোৰ তিনিটাকৈ টিনপাতৰ ঘৰ সম্পূৰ্ণ ৰূপে ভস্মীভূত কৰে। তদুপৰি এই অগ্নিকাণ্ডত তিনিটাকৈ পশুৰ লগতে বৃহৎ পৰিমাণৰ ধান, চাউল, কাপোৰ-কানি আৰু বহু নথি-পত্ৰ পুৰি ছাই হৈ যায়। শ্বৰ্ট চাৰ্কিটৰ ফলত এই অগ্নিকাণ্ড সংঘটিত হোৱা বুলি স্হানীয় ৰাইজে সন্দেহ ব্যক্ত কৰিছে। এই ভয়ংকৰ অগ্নিকাণ্ডত পৰিয়ালটোৰ প্ৰায় তিনি লাখ পঞ্চাশ হাজাৰ টকাৰ সা-সম্পত্তিৰ ক্ষতি হোৱা বুলি জানিব পৰা গৈছে।
প্ৰেৰক সঞ্জীৱ কুমাৰ দাস