ফিফা বিশ্বকাপ ২০২৬ত আয়োজক দেশ মেক্সিকোৱে জয়েৰে আৰম্ভণি কৰি প্ৰথমখন খেলতে দক্ষিণ আফ্ৰিকাক ২-০ গ’লত পৰাস্ত কৰে। ঘৰুৱা দৰ্শকৰ সন্মুখত খেলি মেক্সিকোৱে আৰম্ভণিৰে পৰা আধিপত্য বিস্তাৰ কৰি জয়েৰে অভিযানৰ শুভাৰম্ভ কৰে।
বৃহস্পতিবাৰে এষ্টেকা ষ্টেডিয়ামত অনুষ্ঠিত উদ্বোধনী খেলখনত মেক্সিকোৰ হৈ জুলিয়ান কুইনোনেছ আৰু ৰাউল জিমেনেজে গ’ল কৰে। এই জয়ৰ ফলত মেক্সিকোৱে প্ৰতিযোগিতাত গুৰুত্বপূৰ্ণ তিনিটা পইণ্ট লাভ কৰে। খেলখন উপভোগ কৰিবলৈ ষ্টেডিয়ামত ৮০,৮২৪গৰাকী দৰ্শক উপস্থিত আছিল।
খেলৰ আৰম্ভণিৰে পৰাই মেক্সিকোৱে আক্ৰমণাত্মক ফুটবল প্ৰদৰ্শন কৰে। ইয়াৰ ফলস্বৰূপে ৯ মিনিটতে জুলিয়ান কুইনোনেছে গ’ল কৰি দলটোক ১-০ ব্যৱধানত আগুৱাই নিয়ে। দ্বিতীয়াৰ্ধতো মেক্সিকোৱে নিজৰ দখল বজাই ৰাখে আৰু ৬৬ মিনিটত অভিজ্ঞ ষ্ট্ৰাইকাৰ ৰাউল জিমেনেজে এটা দৰ্শনীয় হেডাৰৰ জৰিয়তে দ্বিতীয় গ’লটো দিয়ে।
এইটো আছিল জিমেনেজৰ আন্তঃৰাষ্ট্ৰীয় কেৰিয়াৰৰ ৪৬সংখ্যক গ’ল। ইয়াৰ জৰিয়তে তেওঁ মেক্সিকোৰ কিংবদন্তি ষ্ট্ৰাইকাৰ জাৰেড বৰ্গেটিৰ সমসংখ্যক গ’লৰ অভিলেখ স্পৰ্শ কৰে। দেশখনৰ সৰ্বাধিক গ’লদাতা জাভিয়েৰ “চিচাৰিটো” হাৰ্নাণ্ডেজৰ অভিলেখ স্পৰ্শ কৰিবলৈ তেওঁক আৰু মাত্ৰ ছয়টা গ’লৰ প্ৰয়োজন।
কলম্বিয়াত জন্মগ্ৰহণ কৰা ২৯ বছৰীয়া ফৰৱাৰ্ড জুলিয়ান কুইনোনেছ এই খেলখনৰ জৰিয়তে বিশ্বকাপত মেক্সিকোৰ হৈ অভিষেক ঘটা ছয়গৰাকী খেলুৱৈৰ অন্যতম। ২০২২ চনৰ কাটাৰ বিশ্বকাপত গ্ৰুপ পৰ্যায়তে বিদায় লোৱা মেক্সিকোৰ বাবে এই জয় আত্মবিশ্বাস বৃদ্ধিকাৰী হিচাপে পৰিগণিত হৈছে।
আনহাতে, দক্ষিণ আফ্ৰিকাৰ বাবে খেলখন হতাশাজনক আছিল। দলটোৱে অহা বৃহস্পতিবাৰে আটলান্টাত অনুষ্ঠিত হ’বলগীয়া পৰৱৰ্তী খেলত চেক গণৰাজ্যৰ সন্মুখীন হ’ব।
খেলখনত শৃংখলাজনিত বিতৰ্কও দেখা যায়। দক্ষিণ আফ্ৰিকাৰ স্পেফেলো সিথোল আৰু থেম্বা জোৱানেক ৰেফাৰীয়ে ৰেড কাৰ্ড দেখুৱায়, ফলত দলটোৱে খেলৰ শেষ মুহূৰ্তত নজন খেলুৱৈৰে খেলিবলগীয়া হয়। আনহাতে, ইনজুৰি টাইমত মেক্সিকোৰ ডিফেণ্ডাৰ চিজাৰ মণ্টেছেও ৰেড কাৰ্ড লাভ কৰে।
উল্লেখ্য যে ফিফা বিশ্বকাপ ২০২৬ বহু দিশৰ পৰা ঐতিহাসিক। প্ৰথমবাৰৰ বাবে বিশ্বকাপত ৪৮টা দলে অংশগ্ৰহণ কৰিছে, যিটো এতিয়ালৈকে সৰ্বাধিক। এইবাৰৰ প্ৰতিযোগিতাখনৰ যৌথ আয়োজক হৈছে মেক্সিকো, কানাডা আৰু আমেৰিকা।
ডিজিটেল ডেস্ক, ১২ জুন