নিয়মীয়া বাৰ্তা ১৬ জুনঃ ভ্রমণ বৃত্তান্ত নোহোৱাকৈ গুৱাহাটীত এজনৰ পিছত আন এজন লোক আক্রান্ত হোৱাত শংকিত হৈ পৰিছে মহানগৰীৰ বাসিন্দাসকল৷ লকডাউন শিথিল কৰাৰ লগে লগে বজাৰ–সমাৰৰ পৰা আৰম্ভ কৰি ৰাজপথত হোৱা ব্যাপক ভিৰে অশনি সংকেত মাতি আনিছে মহানগৰীলৈ৷ এনে পৰিৱেশত ক’ৰোনা ভাইৰাছৰ সংক্রমণ গুৱাহাটীত অধিক দ্রুত হৈ পৰাৰ লগতে সামাজিক সংক্রমণ ঘটাৰো পূর্ণ সম্ভাৱনাই দেখা দিছে৷ ফলত গুৱাহাটীত কিছু দিনৰ বাবে হ’লেও পূর্ণ লকডাউন ঘোষণা কৰাৰ প্রয়োজনীয়তা আছে বুলি মন্তব্য কৰিছে দল–সংগঠন তথা একাংশ সচেতন নাগৰিকে৷ বিশেষকৈ মহানগৰীৰ পৰিস্থিতি ভয়াৱহ নৌহওঁতেই এই পূর্ণ পর্যায়ৰ লকডাউন বলৱৎ কৰিবলৈ চৰকাৰক আহ্বান জনাইছে দল–সংগঠনসমূহে৷ এই সন্দর্ভত ‘নিয়মীয়া বার্তা’ক প্রতিক্রিয়া প্রকাশ কৰি সদৌ গুৱাহাটী ট্রেড ইউনিয়নৰ সহকাৰী সম্পাদক নেকিব শইকীয়াই কয় যে লকডাউন এতিয়াও অব্যাহত আছে৷ ইয়াৰ কোনো পৰিৱর্তন হোৱা নাই৷ কেৱল চৰকাৰে অর্থনৈতিক আৰু প্রশাসনিক কাম–কাজ চলাই নিয়াৰ বাবে কিছু শিথিলতাহে প্রদান কৰিছে যাৰ সুযোগ গ্রহণ কৰিছে একাংশ লোকে৷ ঘৰৰ পৰা বাহিৰলৈ ওলাই অহাৰ সময়ত পালন কৰিবলগীয়া স্বাস্থ্য সম্পর্কীয় বিধিসমূহ অনুকৰণ কৰা নাই বহুতে৷ যাৰ ফলত মহানগৰীত পৰিস্থিতি ভয়াৱহ হৈ পৰাৰ পূর্ণ সম্ভাৱনাই দেখা দিছে৷ সেয়েহে মহানগৰীৰ পৰিস্থিতি ভয়াৱহ হৈ পৰাৰ পৰিৱর্তে পূর্ণ লকডাউন ঘোষণা কৰিব লাগে৷ এই পূর্ণ লকডাউন ১৪ৰ পৰা ২১ দিন হোৱাটো বিচাৰে বুলি উল্লেখ কৰি তেওঁ কয়– ‘কণ্টেইনমেণ্ট জ’নসমূহতো বহু লোকে নির্দিষ্ট নীতি–নিয়ম পালন নকৰে৷ বহু লোক এই অঞ্চলসমূহৰ পৰা বিভিন্ন পথেৰে ওলাই আহে৷ ফলত ইয়াৰ পৰা আন লোক সংক্রমিত হোৱাৰ সম্ভাৱনা আছে৷ এইক্ষেত্রত কঠোৰ হ’ব লাগে প্রশাসন৷ তদন্ত কৰিলে বহু লোক দোষী সাব্যস্ত হ’ব৷ ম’বাইল ফোনৰ ট্রেচিং কৰিলে কণ্টেইনমেণ্ট জ’নৰ পৰা ওলাই অহা লোকৰ তথ্য পোহৰলৈ আহিব৷’
ইফালে, অসম সংগ্রামী মঞ্চৰ সাধাৰণ সম্পাদক সমৰজ্যোতি বেজবৰুৱায়ো গুৱাহাটীত পূর্ণ লকডাউনৰ পোষকতা কৰে৷ অৱশ্যে পূর্ণ লকডাউনৰ পূর্বে চৰকাৰক কিছু পৰিকল্পনাৰ প্রয়োজন হ’ব বুলি তেওঁ কয়– ‘মহানগৰীত ক’ৰোনা ভাইৰাছত আক্রান্ত হোৱাৰ সংখ্যা অতি দ্রুতগতিত বৃদ্ধি পাইছে৷ কোনো ভ্রমণ বৃত্তান্ত নোহোৱা লোক এই ৰোগত আক্রান্ত হৈছে৷ ৰোগীৰ সংস্পর্শলৈ আহিও বহু লোক সংক্রমিত হৈছে৷ বিশেষকৈ ক’ৰোনা ৰোগৰ লক্ষণ নথকা ৰোগী বাহিৰলৈ ওলাই আহিলেও চিনাক্ত কৰাটো অতি কঠিন৷ তেনে লোক বজাৰ–সমাৰ অথবা কার্যালয় আদিলৈ আহিলে ইয়াৰ দ্বাৰা সংক্রমণ অধিক বৃদ্ধি পোৱাটো নিশ্চিত৷ সেয়েহে কিছু দিনৰ বাবে হ’লেও পূর্ণ লকডাউন ঘোষণা কৰিব লাগে আৰু পৰীক্ষাৰ সংখ্যা বৃদ্ধি কৰিব লাগে৷ মহানগৰীখনত পৰীক্ষা কৰি আক্রান্ত লোকসকলক চিনাক্ত কৰি পৃথকীকৰণ কৰাৰ ব্যৱস্থা কৰিলেহে পৰিস্থিতি নিয়ন্ত্রণলৈ আহিব৷’ ইপিনে, তেওঁ এইবুলিও কয় যে পূর্ণ পর্যায়ৰ লকডাউন ঘোষণা কৰাৰ পূর্বে উপযুক্ত পদক্ষেপ চৰকাৰে গ্রহণ কৰিব লাগিব৷ ৰাতিৰ ভিতৰতে চৰকাৰে লকডাউন ঘোষণা কৰিলে পুনৰ লোকসকল সমস্যাৰ সন্মুখীন হ’ব৷ ঔষধ–পাতি, অত্যাৱশ্যকীয় খাদ্যসামগ্রী আদিৰ যাতে কোনো অভাৱ নঘটে, তাৰ ব্যৱস্থা ল’ব লাগিব৷ অন্ততঃ দুই–তিনি দিন সময় মহানগৰবাসীক পূর্ণ লকডাউনৰ বাবে সাজু হ’বলৈ সময় দিব লাগিব৷
আনহাতে, মহানগৰ উন্নয়ন সমিতিৰ সম্পাদক বীৰেন শর্মায়ো অনুৰূপ ব্যৱস্থাৰ কথা উল্লেখ কৰে৷ ক্ষুদ্র ব্যৱসায়ীৰ পৰা আৰম্ভ কৰি কল–কাৰাখানাৰ শ্রমিকসকলক সকাহ দিয়াৰ ব্যৱস্থা কৰিহে পূর্ণ পর্যায়ৰ লকডাউন গুৱাহাটীত বলৱৎ কৰিব লাগে বুলি তেওঁ মত পোষণ কৰে৷ লকডাউনৰ লগতে আর্থিক সমস্যাও সামাজিক সংক্রমণৰ এক কাৰণ হ’ব পাৰে বুলি তেওঁ উল্লেখ কৰি কয়– ‘আমাৰ দেশত বহু পলমকৈ লকডাউন ঘোষণা কৰা হ’ল৷ বহু পূর্বেই লকডাউন হ’ব লাগিছিল৷ অন্ততঃ লকডাউনৰ পূর্বে চাৰি–পাঁচ দিন সময় সাজু হ’বৰ বাবে দেশবাসীক দিব লাগিছিল৷ এনে নকৰাৰ বাবে বহিঃৰাজ্যত আবদ্ধ হৈ পৰা শ্রমিক–শিক্ষার্থীসক হাহাকাৰ পৰিস্থিতিৰ সন্মুখীন হ’বলগীয়া হ’ল৷ আগতীয়াকৈ পৰিকল্পনা কৰি লকডাউন ঘোষণা কৰিলে কোনো আপত্তি নাথাকিব৷’
ইফালে, মহানগৰীৰ উজান বজাৰৰ বাসিন্দা টিনামণি দাসেও গুৱাহাটীত পূর্ণ পর্যায়ৰ লকডাউনৰ পোষকতা কৰে৷ ‘নিয়মীয়া বার্তা’ৰ আগত প্রতিক্রিয়া প্রকাশ কৰি তেওঁ কয়– ‘গুৱাহাটীৰ লোকসকল এতিয়াও ক’ৰোনা ভাইৰাছৰ সংক্রমণক লৈ সজাগ নহয়৷ বেপৰোৱা লোকসকলে গুৱাহাটীত স্বাস্থ্য সম্পর্কীয় বিধি–বিধানসমূহ মানি নচলে৷ বিশেষকৈ ঘৰৰ পৰা বাহিৰলৈ ওলাওঁতে মাস্ক পৰিধান কৰাটো অত্যন্ত প্রয়োজনীয়৷ কিন্তু মহানগৰীত মাস্ক পৰিধান কৰা লোকৰ সংখ্যা যথেষ্ট কম৷ বহু লোকে মাস্কখন লগত ৰাখে, কিন্তু সঠিকভাৱে পৰিধান নকৰে৷ বহুতে ডিঙিত ওলমাই ৰাখে মাস্ক৷ যাৰ বাবে এজনৰ পৰা আন এজনলৈ ক’ৰোনা ভাইৰাছৰ সংক্রমণ হোৱাৰ ভয়াৱহতা বাঢ়ি গৈছে৷’ ইপিনে, হাতীগাঁৱৰ বাসিন্দা ধনমণি দাসেও একেই মত পোষণ কৰি কয় যে মাস্ক পৰিধান আৰু সামাজিক দূৰত্ব মানি চলাটো হৈছে ক’ভিড–১৯ৰ বিৰুদ্ধে যুদ্ধৰ আটাইতকৈ শক্তিশালী অস্ত্র৷ এই দুয়োটা বিধি অতি কঠোৰভাৱে মানি চলিলে ক’ৰোনাত আক্রান্ত হোৱাৰ সম্ভাৱনা যথেষ্ট হ্রাস পায়৷ কিন্তু ইয়াক লৈ কোনো যেন সচেতন নহয়৷ বজাৰ–সমাৰত গাতে গা লগাই থকা দেখা যায়৷ সামাজিক দূৰত্বৰ কোনো নিয়মেই দেখা নাযায় বহু স্থানত৷ বিশেষকৈ ৰাজহুৱা স্থানসমূহত এই নিয়মসমূহ মানি নচলাৰ বাবে ক’ৰোনাৰ ভয়াৱহতা দিনক দিনে বৃদ্ধি পাইছে৷ সেয়েহে পূর্ণ পর্যায়ৰ লকডাউনেহে মহানগৰীক দ্রুত সংক্রমণৰ পৰা ৰক্ষা কৰিব পাৰিব৷