নিয়মীয়া বাৰ্তা, ৩০ জুনঃ বিদ্যালয়–মহাবিদ্যালয়কে ধৰি দেশৰ সকলো শিক্ষানুষ্ঠান অহা ৩১ জুলাই পর্যন্ত বন্ধ ৰখাৰ সিদ্ধান্ত লৈছে কেন্দ্রীয় চৰকাৰে৷ দেশজুৰি ক’ভিড–১৯ৰ সংহাৰী ৰূপ অব্যাহত থকাৰ পৰিপ্রেক্ষিতত কালি কেন্দ্রীয় গৃহ মন্ত্রালয়ে এই নতুন নির্দেশনা জাৰি কৰে৷ বিভিন্ন ৰাজ্য আৰু কেন্দ্রীয়শাসিত অঞ্চলৰ পৰামর্শৰ পাছত কেন্দ্রীয় চৰকাৰৰ বিভিন্ন মন্ত্রালয় আৰু বিভাগৰ সৈতে আলোচনামর্মে এই সিদ্ধান্ত লোৱা গৈছে৷
দেশৰ সকলো শিক্ষা প্রতিষ্ঠান যোৱা ১৬ মার্চৰে পৰা বন্ধ হৈ আছে৷ উল্লেখ্য যে আনলক–১ৰ নীতি–নির্দেশনাতে উল্লেখ কৰা হৈছিল যে সকলো পক্ষৰ সৈতে আলোচনা কৰি শিক্ষানুষ্ঠান খোলা সন্দর্ভত সিদ্ধান্ত গ্রহণ কৰা হ’ব৷ আনহাতে, ক’ভিড–১৯ৰ নীতি–নির্দেশনা মানি চলা কেন্দ্রীয় আৰু ৰাজ্য চৰকাৰৰ প্রশিক্ষণ কেন্দ্রসমূহ ১৫ জুলাইৰ পৰা খোলাৰ অনুমতি দিয়া হয়৷ ইফালে নীট আৰু জে ই ই মেইন সন্দর্ভত চৰকাৰে কোনো নির্দেশনা জাৰি কৰা নাই৷ ১৫ লাখ শিক্ষার্থীয়ে অৱতীর্ণ হ’ব লগা এই দুই পৰীক্ষা ১৮ জুলাইৰ পৰা ২৬ জুলাইলৈ অনুষ্ঠিত হোৱাৰ কথা আছে৷