নিয়মীয়া বাৰ্তা, ৩০ জুনঃ গুৱাহাটী মহানগৰীকে ধৰি ৰাজ্যখনৰ বিভিন্ন প্রান্তত ক’ভিড–১৯ৰ গণ সংক্রমণৰ শংকাত জনসাধাৰণ ত্রস্তমান হৈ থকাৰ সময়তে নিতৌ গৰিষ্ঠসংখ্যক সুস্থ হৈ চিকিৎসালয়ৰ পৰা নিজ গৃহলৈ উভতিবলৈ সক্ষম হৈছে৷ কালিৰ দিনটোতো ২৪৫গৰাকী লোক বিভিন্ন হাস্পতালৰ পৰা সুস্থ হৈ নিজ নিজ ঘৰলৈ উভতি যায়৷
ইয়াৰ লগে লগে ৰাজ্যখনত ক’ভিড–১৯ত আক্রান্ত হৈ সুস্থ হোৱা লোকৰ সংখ্যা ৫,৩৩৩গৰাকীলৈ বৃদ্ধি পালে৷ আনহাতে, কালিৰ দিনটোত ৰাজ্যখনত ৩০২ গৰাকী লোক নতুনকৈ ক’ৰোনাত আক্রান্ত হয়৷ আক্রান্তসকলৰ ১৭২ গৰাকীয়েই হৈছে গুৱাহাটীৰ৷ বর্তমান ৰাজ্যখনত কভিড–১৯ত আক্রান্ত লোকৰ সংখ্যা বৃদ্ধি হৈছে ৭,৭৯৪ গৰাকী৷
ইয়াৰে ২,৪৪৭ গৰাকী বিভিন্ন চিকিৎসালয়ত চিকিৎসাধীন হৈ আছে৷ এতিয়ালৈ মুঠ ১১গৰাকী লোকৰ মৃত্যু হৈছে আৰু বহিঃৰাজ্যৰ ৩গৰাকী লোক নিজ ৰাজ্যলৈ উভতি গৈছে৷ অসমত বর্তমান সুস্থ হৈ উঠা লোকৰ হাৰ ৭১.২ শতাংশ৷ আনহাতে, ছোৱাব পৰীক্ষাৰ ক্ষেত্রত অসমে অভিলেখ স্থাপন কৰি কালিৰ দিনটোলৈকে মুঠ ৩,৯৯,৩৯৩টা নমুনা পৰীক্ষা কৰে৷