আহিছে ইতিবাচক বতৰাঃ ক’ৰোনা ভেকচিনৰ সফল পৰীক্ষণ সম্পন্ন

নিয়মীয়া বাৰ্তা, ১৭ জুলাইঃ বিশ্বজুৰি ক’ৰোনাই মহামাৰীৰ ৰূপ ধাৰণ কৰি মৃত্যুদূত ৰূপে চিহ্ণিত হোৱাৰ সময়তে অক্স’ফর্ড বিশ্ববিদ্যালয়ৰ পৰা আহিছে ইতিবাচক বতৰা৷ ক’ৰোনা ভাইৰাছ প্রতিৰোধী ভেকচিন প্রস্তুতৰ বাবে সমগ্র বিশ্বৰ বিভিন্ন গৱেষণা প্রতিষ্ঠান, বিশ্ববিদ্যালয় আদিয়ে নিৰৱচ্ছিন্ন গৱেষণা অব্যাহত ৰখাৰ সময়তে অক্সফ’ড বিশ্ববিদ্যালয়ৰ এই সম্পর্কীয় গৱেষণাই লাভ কৰিছে অভূতপূর্ব সফলতা৷ ইতিমধ্যে মানৱ দেহত চলোৱা এই ভেকচিনৰ সফল সম্পৰীক্ষণে মহামাৰীপীড়িত বিশ্বলৈ কঢ়িয়াই আনিছে ।ইতিবাচক বার্তা৷ উল্লেখ্য যে অক্সফ’ড বিশ্ববিদ্যালয় জেনাৰ ইনষ্টিউটত ব্রিটিছ চৰকাৰ আৰু আছট্রা জেনেকা নামৰ ঔষধ কোম্পানীটোৰ সহযোগত ক’ৰোনা ভাইৰাছ প্রতিৰোধী ভেকচিন প্রস্তুতৰ গৱেষণা যোৱা এপ্রিল মাহৰ পৰা আৰম্ভ হৈছে৷ ইতিমধ্যে এই ভেকচিনৰ মানৱ দেহত চলোৱা প্রথমটো সম্পৰীক্ষণৰ অন্তত ভেকচিনটোৱে ক’ৰোনা ভাইৰাছৰ বিৰুদ্ধে দুগুণ প্রতিৰোধ গঢ়ি তুলিব পাৰে বুলি প্রমাণিত হৈছে৷ প্রথম পর্যায়ৰ সম্পৰীক্ষণত এই ভেকচিনটো স্বাস্থ্যৱান প্রাপ্তবয়স্ক লোকৰ শৰীৰত প্রয়োগ কৰা হৈছিল৷ ভেকচিনটো প্রয়োগ কৰাৰ পাছত এই লোকসকলৰ ৰোগ প্রতিৰোধ ক্ষমতা দুগুণ বৃদ্ধি পোৱাৰ লগতে তেজ পৰীক্ষাৰ অন্তত শৰীৰত ৰোগ প্রতিৰোধ জীৱাণু অর্থাৎ এণ্টিব’ডী আৰু কিলাৰ–টি–চেলছ উৎপন্ন হোৱা বুলি প্রমাণিত হৈছে৷

ক’ৰোনা ভাইৰাছৰ আক্রমণ প্রতিৰোধ কৰিবলৈ মানৱ শৰীৰত ৰোগ প্রতিৰোধ ক্ষমতা বৃদ্ধি কৰাটো অর্থাৎ ইমিউন ছিষ্টেম শক্তিশালী কৰাটো সবাতোকৈ জৰুৰী বুলি চিকিৎসকসকলে মত পোষণ কৰি আহিছে৷ অক্সফ’ড বিশ্ববিদ্যালয়ৰ বিজ্ঞানীৰ দলটোৱে প্রস্তুত কৰা এই ভেকচিনটো এই দিশৰ পৰা যথেষ্ট পৰিমাণে সফল হোৱা বুলি ব্রিটিছ সংবাদ মাধ্যমে প্রকাশ কৰিছে৷ অক্সফ’ডৰ বিজ্ঞানীসকলে সফলতা অর্জন কৰাChAdOx1 nCoV-19 নামৰ এই ভেকচিনটো সফল পৰীক্ষণৰ পাছত ব্রিটেইনৰ স্বাস্থ্য সচিব মাট হেনককে কয় যে অক্সফ’ডৰ বিজ্ঞানীৰ দলটোৱে লাভ কৰা সফলতাই আশাৰ বার্তা বহন কৰিছে৷ এই বর্ষৰ ভিতৰতে অথবা ২০২১ চনৰ প্রথম ভাগত ভেকচিনটো উপলব্ধ হ’ব বুলি আশা কৰা হৈছে৷ আনহাতে, বার্কশ্বায়াৰ ৰিছার্চ এথিকছ কমিটীৰ অধ্যক্ষ ডেভিদ কার্পেণ্টাৰে অক্সফ’ড বিশ্ববিদ্যালয়ৰ ক’ৰোনা ভাইৰাছ প্রতিৰোধী ভেকচিনৰ পৰীক্ষাৰ ক্ষেত্রত অনুমোদন জনাইছে আৰু বিজ্ঞানীসকলক ইয়াৰ যি ধৰণৰ সংশোধনৰ প্রয়োজন, সেয়া কৰিবলৈ আহ্বান জনাইছে৷ তেওঁৰ মতে, এই পৰীক্ষা সম্পূর্ণভাৱে সফলতাৰ পথত৷ কার্পেণ্টাৰে জনোৱা মতে, এতিয়া অক্সফ’ডৰ বিজ্ঞানীৰ দলটোৱে চিকিৎসালয়, চিকিৎসালয়ত থকা ৰোগী, চিকিৎসক আৰু চিকিৎসা কর্মীয়ে লাভ কৰা তথ্যসমূহৰ পৰা নিজৰ গৱেষণা অধিক ফলপ্রসূ কৰাৰ প্রয়োজন৷

আনহাতে, এই ভেকচিন কেতিয়া উপলব্ধ হ’ব বুলি সোধা এক প্রশ্ণৰ উত্তৰত অধ্যক্ষজনে কয়– আমি কোনো ধৰণৰ নির্দিষ্ট তাৰিখ এই মুহূর্তত ক’ব নোৱাৰোঁ৷ কিন্তু বিশ্বৰ কোনো বৃহৎ ঔষধ কোম্পানীয়ে যদি এই ভেকচিন প্রস্তুতৰ ক্ষেত্রত পূর্ণ সহযোগিতা আগবঢ়ায়, তেতিয়াহ’লে ছেপ্ঢেম্বৰৰ ভিতৰত এয়া উপলব্ধ হোৱাৰ সম্ভাৱনা আছে৷ তেনে লক্ষ্যৰেই অক্সফ’ড বিশ্ববিদ্যালয়ৰ বিজ্ঞানীৰ দলটোৱে কাম কৰা বুলিও কার্পেণ্টাৰে জনায়৷ ইফালে বিশ্বৰ প্রখ্যাত ঔষধ কোম্পানী আষ্ট্রা জেনেকাই অক্সফ’ডৰ এই ভেকচিনৰ ৪ শ মিলিয়ন ড’জ প্রস্তুতৰ বাবে ইউৰোপৰ ইনক্লুচিভ ভেকচিনছ এলায়েন্সৰ সৈতে চুক্তিবদ্ধ হৈছে৷ এই চুক্তি অনুসৰি ঔষধ কোম্পানীটোৱে চলিত বর্ষৰ শেষৰ ফালে কোনো ধৰণৰ লাভ নোলোৱাকৈ ৪শ মিলিয়ন ভেকচিন যোগান ধৰিব বুলি প্রকাশ কৰিছে৷

উল্লেখ্য যে যোৱা ১৯ জুনত লণ্ডনৰ ইম্পেৰিয়েল কলেজত এই ভেকচিনৰ মানৱ দেহত প্রথম সম্পৰীক্ষণ চলিছিল৷ ৩০০জন প্রাপ্তবয়স্ক লোকৰ শৰীৰত প্রথমবাৰৰ বাবে এই ভেকচিন প্রয়োগ কৰি পৰীক্ষা চলোৱা হৈছিল৷ এই পৰীক্ষণৰ সফলতাৰ পাছত এতিয়া বিশ্বজুৰি ইয়াক লৈ ব্যাপক চর্চা হৈছে৷ উল্লেখ্য যে যিকোনো মহামাৰীসদৃশ ভাইৰাছ প্রতিৰোধী ভেকচিন প্রস্তুতৰ বাবে এক দীঘলীয়া সময়ৰ প্রয়োজন৷ কিয়নো এই ভেকচিনটো কিমান সুৰক্ষিত আৰু নিৰাপদ, সেয়া নির্ধাৰণ কৰিবলৈ বিজ্ঞানীসকলক কিছু সময়ৰ প্রয়োজন হয়৷

আনহাতে, এই ভেকচিনটোৰ পৰা হ’ব পৰা ছাইড এফেক্ট আৰু এজন মানুহক কিমান পৰিমাণৰ ড’জৰ প্রয়োজন, সেয়াও ভেকচিন প্রস্তুতৰ সময়তেই নিশ্চিত হ’ব লাগিব৷ তাৰ পাছতহে যিকোনো ধৰণৰ ভেকচিন ব্যৱসায়িকভাৱে উপলব্ধ হয়৷ শেহতীয়াকৈ ক’ৰোনা ভাইৰাছে বিশ্বজুৰি মহামাৰী ৰূপ ধাৰণ কৰাৰ লগতে লাখ লাখ লোকৰ মৃত্যু হোৱাৰ পাছত এই ভাইৰাছ প্রতিৰোধী ভেকচনক লৈ সমগ্র বিশ্বই অধীৰ অপেক্ষাত আছে৷ ইতিমধ্যে আমেৰিকা, জার্মানী, ৰাছিয়া, ইটালী, ব্রিটেইন, ভাৰত, চীন আদি দেশত বিভিন্ন পর্যায়ত ভেকচিন প্রস্তুতৰ গৱেষণা অব্যাহত আছে৷ এনে গৱেষণাৰ মাজতে অক্সফ’ড বিশ্ববিদ্যালয়ৰ মানৱ দেহত চলোৱা সম্পৰীক্ষণৰ সফলতা এক মাইল ষ্ট’ন হিচাপে বিবেচিত হৈছে৷