নিয়মীয়া বাৰ্তা, ২০ জুলাইঃ ৰাজ্যৰ বিত্ত, স্বাস্থ্য তথা গড়কাপ্ঢানী মন্ত্রী ড০ হিমন্ত বিশ্ব শর্মাৰ উজনি অসম ভ্রমণৰ মাজতে মন্ত্রীগৰাকী হঠাতে উপস্থিত হয় নামৰূপ সাৰ কাৰখানাত৷ যোৱা সময়ছোৱাত কাৰিকৰী বিজুতি তথা দুর্ঘটনা সংঘটিত হৈ বন্ধ হৈ থকা কাৰখানাটোত পৰিস্থিতিৰ বুজ ল’বলৈ মন্ত্রী শর্মাৰ উপস্থিতিক লৈ বিশেষ তৎপৰতা বৃদ্ধি পায় কাৰখানাটোৰ বিষয়া–কর্মচাৰীৰ মাজত৷ উল্লেখ্য যে কাৰিকৰী দুর্ঘটনাৰ ফলত যোৱা দীর্ঘদিন বন্ধ হৈ থকা নামৰূপ সাৰ কাৰখানা পুনৰুজ্জীৱিত কৰিবলৈ বিভিন্ন পক্ষই দাবী তুলি আহিছে যদিও এইক্ষেত্রত কার্যকৰী পদক্ষেপ গ্রহণ কৰা হোৱা নাই৷ আনকি যোৱা ১১ জুলাইত স্থানীয় সাংসদ তথা কেন্দ্রীয় মন্ত্রী ৰামেশ্বৰ তেলীয়ে উদ্যোগটোৰ কর্তৃপক্ষ আৰু ইউনিয়নৰ বিষয়ববীয়াৰ লগত আলোচনাত মিলিত হৈ সাৰ কাৰখানাটো পুনৰ কার্যক্ষম কৰাৰ আশ্বাস দিছিল৷ এনে প্রতিশ্রুতিৰ পাছতেই আজি ৰাজ্যৰ বিত্ত তথা স্বাস্থ্যমন্ত্রীগৰাকী কাৰখানাটোত উপস্থিত হোৱা বিষয়টোৱে কর্মচাৰীসকললৈ ইতিবাচক বার্তা কঢ়িয়াই আনিছে৷ মন্ত্রী ড০ শর্মাই সাৰ কাৰখানাৰ কর্তৃপক্ষ আৰু ইউনিয়নৰ বিষয়ববীয়াসকলৰ সৈতে এক আলোচনাতো মিলিত হয়৷ এই আলোচনাকালতে উদ্যোগটোৰ অধ্যক্ষ তথা পৰিচালন সঞ্চালক অসীম কুমাৰ ঘোষে সাৰ কাৰখানাটো পুনৰ জীৱিত কৰাৰ ক্ষেত্রত গ্রহণ কৰিবলগীয়া ব্যৱস্থাৱলী সম্পর্কে মন্ত্রীগৰাকীক অৱগত কৰে৷ এই বৈঠকতে প্রস্তাৱিত চতুর্থটো উৎপাদন গোটক সম্ভাব্য উৎপাদন, উৎপাদিত সামগ্রীৰ বজাৰ আদিকে ধৰি বিভিন্ন দিশ বিস্তাৰিতভাৱে আলোচনা কৰা হয়৷ বিশেষকৈ প্রস্তাৱিত গোটটোত বিনিয়োগকাৰী উদ্যোগসমূহৰ বিনিয়োগ সন্দর্ভতো বৈঠকত আলোচনা চলে৷
ইফালে অর্থ সংকটৰ সন্মুখীন হোৱা নামৰূপ সাৰ কাৰখানা পুনৰুজ্জীৱিতকৰণৰ্ বাবদ কেন্দ্রৰ পৰা ১০০ কোটি টকাৰ প্রয়োজনীয়তাৰ কথা আজি মন্ত্রী শর্মাক অৱগত কৰে কর্তৃপক্ষই৷ এই সন্দর্ভত মন্ত্রী ড০ শর্মাই বিষয়টো কেন্দ্রীয় বিত্তমন্ত্রী নির্মলা সীতাৰমণৰ সৈতে শীঘ্রে যোগাযোগ কৰি ধনৰাশি মোকলাই অনাৰো আশ্বাস দিয়ে৷ সাৰ কাৰখানাটো পৰিদর্শৰ সময়ত মন্ত্রী ড০ শর্মাক সংগ দিয়ে কেন্দ্রীয় মন্ত্রী ৰামেশ্বৰ তেলী, বিজেপি যুৱ মর্চাৰ উপ–সভাপতি তৰংগ গগৈ আৰু সাংসদ প্রদান বৰুৱাই৷ উল্লেখ্য যে উদ্যোগটোৰ জইণ্ট কাউঞ্চিল অৱ অফিচাৰ, ফার্টিলাইজাৰৰ শ্রমিক ইউনিয়ন, ফার্টিলাইজাৰৰ ৱকার্ছ ইউনিয়নৰ তৰফৰ পৰা চতুর্থ গোট স্থাপন আৰু উদ্যোগটোত বিভিন্ন সমস্যা সন্দর্ভত মন্ত্রী ড০ শর্মাক এখন স্মাৰক–পত্র প্রদান কৰে৷