নিয়মীয়া বার্তা, ১৭ আগষ্টঃ মৰিগাঁও নগৰৰ সমীপৰৱতী বৰঙাবাৰীৰ মৰিগাঁও-লাহৰীঘাট সংযোগী গড়কাপ্তানী পথত আজি সন্ধিয়া প্ৰায় ৬ মান বজাত সংঘটিত এক শোকাৱহ পথ দূঘটনাত এগৰাকী মহিলা থিতাতে মৃত্যু হয়। মৃত্যু হোৱা মহিলা গৰাকী বৰঙাবাৰী গাঁৱৰ পুতুলী হাজৰিকা(৪০) বুলি জানিব পৰা গৈছে। স্থানীয় ৰাইজে জানিবলৈ দিয়া মতে বৰঙাবাৰী গাঁৱৰ পুতুলী হাজৰিকাই কন্যাসহ স্কুটিত গাঁৱৰে সমীপৰ এটা শিৱ মন্দিৰত সেৱা কৰিবলৈ গৈছিল । কিন্তু বিধিৰ বিড়ম্বনাত পুতুলী হাজৰিকা মন্দিৰত পাবলৈ এশ মিটাৰ মান থকা অৱস্থাত বিপৰীত দিশৰ পৰা ট্ৰাকৰ চেপাত অতি কৰুণ ভাবে মৃত্যুক আকোৱালী লয়। বৰঙাবাৰী গাঁও পঞ্চায়ত কাৰ্যালয়ৰ সন্মুখতে মৰিগাঁও অভিমুখে আহি থকা এ এছ ০৯ এ চি -২৩৬৭ নম্বৰ ট্ৰাক খনে স্কুটি আৰোহী মাতৃ-কণ্যাক সন্মুখৰ পৰা খুন্দা মৰাত মাতৃ পুতুলি হাজৰিকাই নিয়ন্ত্ৰণ হেৰুৱাই ট্ৰাক খনৰ চকাৰ তলত সোমাই পৰাত লগে লগে মৃত্যু মুখত পৰে। ইফালে কণ্যা গৰাকী বিপৰীত দিশে বাগৰি পৰাত সৌভাগ্য ক্ৰমে প্ৰাণ ৰক্ষা পৰে । মাতৃ আৰু কণ্যাৰ এই শোকাৱহ দূঘটনাই সমগ্ৰ অঞ্চলটোতে শোকৰ ছাঁ পৰে। আনহাতে ঘটনাস্থলীত আৰক্ষী উপস্থিত হৈ চালকজনক গ্ৰেপ্তাৰ কৰা লগতে ঘাতক ট্ৰাকখন জব্দ কৰা বুলি জানিব পৰা গৈছে।