নিয়মীয়া বাৰ্তা ১৩ অক্টোবৰঃ দীর্ঘদিন ধৰি আইনী মেৰপেঁচত সোমাই থকা ২০১৮ বর্ষৰ সংযুক্ত প্রতিযোগিতামূলক মূল পৰীক্ষাৰ ফলাফল সোমবাৰে ঘোষণা কৰিছে অসম লোকসেৱা আয়োগে (এ পি এছ চি)৷ গুৱাহাটী উচ্চ ন্যায়ালয়ে অনুমতি প্রদান কৰাৰ পাছতে এই ফলাফল ঘোষণা কৰিছে আয়োগে৷ ২০১৯ বর্ষৰ ২ আগষ্টৰ পৰা ২৯ আগষ্টলৈ সংযুক্ত প্রতিযোগিতামূলক মূল পৰীক্ষা অনুষ্ঠিত হৈছিল৷ মূল পৰীক্ষাত উত্তীর্ণ হোৱা প্রার্থীসকল মৌখিক পৰীক্ষাত অৱতীর্ণ হ’ব লাগিব৷ অহা ২৮ অক্টোবৰৰ পৰা মৌখিক সাক্ষাৎকাৰসমূহ অনুষ্ঠিত হ’ব৷ উল্লেখ্য যে ২০১৮ বর্ষৰ সংযুক্ত প্রতিযোগিতামূলক মূল পৰীক্ষাৰ প্রশ্ণকাকতত ভুল এনছাৰ কী আদিকে ধৰি কেইবাটাও খেলিমেলিৰ বাবে সমগ্র প্রক্রিয়াটো আইনী মেৰপেঁচত সোমাই পৰিছিল৷ কেইবাগৰাকীও বঞ্চিত প্রার্থীয়ে দাখিল কৰা লেখ আবেদনৰ শুনানি গ্রহণ কৰি গুৱাহাটী উচ্চ ন্যায়ালয়ে পৰীক্ষাৰ ফলাফল ঘোষণাত স্থগিতাদেশ জাৰি কৰিছিল৷ দীর্ঘদিনীয়া শুনানিৰ অন্তত শেহতীয়াকৈ গুৱাহাটী উচ্চ ন্যায়ালয়ে মূল পৰীক্ষাৰ ফলাফল ঘোষণা কৰিবলৈ আয়োগক অনুমতি প্রদান কৰিছিল৷ সমান্তৰালভাৱে মৌখিক পৰীক্ষা অনুষ্ঠিত কৰাৰো অনুমতি প্রদান কৰিছিল ন্যায়ালয়ে৷ অৱশ্যে মৌখিক পৰীক্ষা অনুষ্ঠিত কৰিলেও চূড়ান্ত ফলাফল ন্যায়ালয়ৰ অনুমতি অবিহনে ঘোষণা কৰিব নোৱাৰিব অসম লোকসেৱা আয়োগে৷