নিয়মীয়া বাৰ্তা ২ নৱেম্বৰঃ শুৱালকুছিৰ এগৰাকী ২১ বছৰীয়া যুৱতীক মুম্বাইত চাকৰি দিয়াৰ প্রলোভনেৰে সুদূৰ মুম্বাইৰ পৰা অহা এগৰাকী যুৱতী কালি আৰক্ষীৰ হাতত আটক হোৱা ঘটনাই সমগ্র অঞ্চলতে তীব্র প্রতিক্রিয়া সৃষ্টি কৰিছে৷ শুৱালকুছিৰ যুৱতীগৰাকীৰ পিতৃ উত্তৰ জানৰপাৰ নিৱাসী মনো মেধিয়ে জানিবলৈ দিয়া মতে, শুৱালকুছি মহাবিদ্যালয়ত স্নাতক শ্রেণীত অধ্যয়নৰত তেওঁৰ দ্বিতীয় কন্যাক কিছুদিন আগৰে পৰা মুম্বাইৰ এগৰাকী যুৱতীয়ে ফোন কৰি চাকৰি দিয়াৰ বিষয়ে জনায়৷ হিন্দীভাষী যুৱতীগৰাকীয়ে তেওঁৰ কন্যাৰ ম’বাইল নম্বৰ কিদৰে ক’ৰ পৰা সংগ্রহ কৰিছে, তেওঁলোক জ্ঞাত নহয়৷ এনেদৰে দুয়োগৰাকীৰ মাজত চাকৰি সন্দর্ভত কথা–বার্তা চলি থকাৰ মাজতে কালি পুৱা হঠাৎ মুম্বাইৰ যুৱতীগৰাকীৰ পৰা এটা ফোন আহে৷ ফোনত শুৱালকুছিৰ যুৱতীগৰাকীক বৰঝাৰ বিমানবন্দৰলৈ মাতে আৰু কালিয়েই চাকৰিত যোগদান কৰাৰ বাবে সাজু হৈ আহিবলৈ জনায়৷ চাকৰিৰ লোভত শুৱালকুছিৰ যুৱতীগৰাকী হৰেকৃষ্ণ দাস নামৰ এজন সম্বন্ধীয়ৰ লগত পুৱা ৯ বজাত বৰঝাৰ বিমানবন্দৰলৈ যায়৷ তাত মুম্বাইৰ ৩৬ বছৰীয়া ৰূপালী পাণ্ডাৰী নামৰ যুৱতীগৰাকীক লগ পায়৷ লগ হোৱাৰ পাছতে ৰুদ্র হোটেল নামৰ এখন চাহৰ দোকানত তিনিও চাহ–মিঠাই খাবলৈ যায় যদিও সম্বন্ধীয় হৰেকৃষ্ণই হোটেলত চাহ খাব নিবিচাৰিলে৷ তেওঁ বাহিৰত অপেক্ষা কৰি থাকিল৷ কিছু পলম হোৱাত হোটেলখনলৈ দুয়োগৰাকীক বিচাৰি যায় যদিও হোটেলত এগৰাকীকো দেখা নাপাই তেওঁ চিন্তিত হৈ পৰে৷ হোটেলৰ মেনেজাৰক সোধাত দুয়োগৰাকী হোটেলৰ পৰা ওলাই যোৱা বুলি কয়৷ পাছত বহু দেৰিলৈকে যুৱতী দুগৰাকীৰ কোনো শুংসূত্র নোপোৱাত হৰেকৃষ্ণই ঘৰলৈ ফোন কৰি সকলো জনায়৷ পৰিয়ালৰ লোকে লগে লগে এই সম্পর্কে আৰক্ষীক অৱগত কৰিবলৈ তেওঁক পৰামর্শ দিয়ে৷ তেওঁ সেইমর্মে আজাৰা থানাত উপস্থিত হৈ আৰক্ষীক সকলো কথা বিৱৰি কোৱাত আজাৰা আৰক্ষীয়ে এখন এজাহাৰ দিবলৈ কয়৷ ইতিমধ্যে আৰক্ষীয়ে বেতাঁৰ বার্তাযোগে আৰক্ষী থানাসমূহত খবৰ দিয়ে৷ আৰক্ষীৰ বেতাঁৰ বার্তা লাভ কৰাৰ পাছতে থানাসমূহ সক্রিয় হৈ পৰে আৰু বিমানবন্দৰৰ মুম্বাইমুখী বিমানৰ ৩ নম্বৰ প্লেটফর্মৰ ওচৰত আৰক্ষীয়ে দুয়োগৰাকীক উদ্ধাৰ কৰে৷ পাছত আজাৰা আৰক্ষীয়ে দুয়োগৰাকী যুৱতীক নিশা ৯ বজাত শুৱালকুছি থানাত চমজাই দিয়ে৷ নিশা পিতৃ মনো মেধিয়ে নিজৰ কন্যাক ঘৰলৈ নিয়াৰ বিপৰীতে শুৱালকুছিৰ আৰক্ষীয়ে নিশাই মুম্বাইৰ ৰূপা পাণ্ডাৰীক গুৱাহাটীৰ ষ্টেট হোমত থৈ আহে৷ শুৱালকুছি আৰক্ষীয়ে ঘটনাটো সন্দর্ভত তদন্ত আৰম্ভ কৰিছে৷