নিয়মীয়া বাৰ্তা, ১৬ নবেম্বৰঃ বিটিচি নির্বাচনৰ দিন চমু চাপি অহাৰ লগে লগে বিটিএডিত নির্বাচনী বতাহ উত্তপ্ত হৈ উঠিছে৷ ৰাজনৈতিক দলসমূহে আৰম্ভ কৰিছে নির্বাচনী প্রচাৰ৷ ইয়াৰ মাজতে বিপিএফ আৰু বিজেপিৰ মাজত চলা নির্বাচনী যুঁজখন আকর্ষণীয় হৈ উঠিছে৷ বিজেপিৰ হৈ নেডাৰ আহ্বায়ক তথা ৰাজ্যৰ বিত্ত, স্বাস্থ্যমন্ত্রী ড০ হিমন্ত বিশ্ব শর্মাই বিটিচিত ধাৰাবাহিকভাৱে অব্যাহত ৰাখিছে নির্বাচনী প্রচাৰ৷ বাক্সাৰ মথনগুৰি আৰু ওদালগুৰিৰ ঔৰঙাজুলি চাহ বাগিচাত দুখনকৈ নির্বাচনী সভাত অংশগ্রহণ কৰে৷ দুয়োখন সভাতে হাগ্রামা মহিলাৰী নেতৃত্বাধীন বিপিএফৰ লগতে বিগত ১৭ বছৰীয়া শাসনকালত সংঘটিত দুর্নীতি–নিয়মক কঠোৰ ভাষাৰে সমালোচনা কৰে নেডাৰ আহ্বায়কগৰাকীয়ে৷
২০ নম্বৰ মথনগুৰি সমষ্টিৰ বিজেপি প্রার্থী গৌতম দাসৰ হৈ বাক্সাৰ বেলগুৰিত এখন বিশাল নির্বাচনী সভাত অংশগ্রহণ কৰি ড০ শর্মাই কয়–‘হাগ্রামা মহিলাৰীৰ আজি টোপনি নাহিব৷ বিপিএফ আমাৰ লগত চৰকাৰত আছিল বা আছে৷ আমাৰ এটাই উদ্দেশ্য আছিল বিটিচিত সকলোৰে অধিকাৰ অক্ষুণ্ণ থাকক৷ সকলোৱে মর্যাদাসহকাৰে জীয়াই থাকক৷ প্রতিবছৰে এহাজাৰৰ পৰা ১৫শ কোটি টকা আমি বিটিচিত দি আহিছোঁ৷ বিটিচিত আজিলৈকে অন্যান্য জাতি–জনগোষ্ঠীৰ লোকে মাটিৰ পট্টা পোৱা নাই৷ বিজেপি আৰু পাপৰ ভাগ ল’বলৈ সাজু নহয়৷ বিটিচিত প্রতিজন মানুহে ভূমিৰ অধিকাৰ লাভ কৰিব লাগিব৷ এই অধিকাৰ আমি দিম৷’ ইফালে, বিটিচিত সংঘটিত হোৱা দুর্নীতি সন্দর্ভত মন্ত্রীগৰাকীয়ে কয় যে বিটিচিত বিধৱা আৰু বৃদ্ধ পেন্সন লাভ কৰিবলৈও টকা দিবলগীয়া হয়৷ দিল্লীৰ পৰা পিঠা পঠিয়াইছে, দিছপুৰৰ পৰা পিঠা পঠিয়াইছে, হাগ্রামা মহিলাৰীৰ মেকুৰী ভিচিডিচিয়ে এই পিঠা খাই পেলাইছে৷ ইফালে, হাগ্রামাৰ চৰকাৰ নাথাকিলে বিটিচিত অশান্তি হ’ব বুলি বিপিএফে কৰা প্রচাৰ সন্দর্ভত তেওঁ কয়–‘হাগ্রামা মহিলাৰীৰ শান্তি আমাক নালাগে, আমাক বিটিচি ৰাইজৰ শান্তি লাগে৷ প্রথমবাৰৰ বাবে বড়ো জনগোষ্ঠীৰ সকলো নেতাই বিটিআৰ চুক্তিত চহী কৰিছে৷ অসমখন আমি দুভাগ কৰিব নিবিচাৰোঁ৷ এই বিটিআৰ চুক্তি বেয়া বুলি ক’বলৈ আৰম্ভ কৰিছে৷ বিটিচিত চাকৰি প্রদানৰ নামতো ব্যাপক দুর্নীতি সংঘটিত হৈছে৷ পকেটত চাকৰিৰ লিষ্ট লৈ ঘূৰি ফুৰে হাগ্রামাই৷ এই লিষ্ট মতেহে চাকৰি পায়৷ পঢ়া–শুনা কৰা ল’ৰাৰ কাম নাইকিয়া হৈছে৷’
আনহাতে, হাগ্রামাক বিটিচিত চীফ বুলি কৰা সম্বোধন সন্দর্ভত প্রতিক্রিয়া প্রকাশ কৰি ভাষণত মন্ত্রীগৰাকীয়ে কয় যে চীফ কি বস্তু৷ প্রধানমন্ত্রীয়ে নিজকে ৰাইজৰ সেৱক বুলি প্রকাশ কৰি আহিছে৷ আৰু হাগ্রামাক চীফ বুলি ক’বলগীয়া হৈছে৷ চীফ নহয়, ৰাইজৰ সেৱক হ’ব লাগিব৷ বিটিচিৰ ৰাইজক হাগ্রামাই ঘৰৰ পৰা পইচা দিয়া নাই বুলি উল্লেখ কৰি ড০ শর্মাই কয়–‘বিটিচিক ৰাজ্য চৰকাৰৰ আঁচনি ৰূপায়ণৰ দায়িত্ব দি আমি ভুল কৰিছিলোঁ৷ আমাৰ কোনো মিত্রতা নাই৷ বিপিএফৰ লগত আমাৰ মিত্রতা নাই৷ কোকৰাঝাৰত আমাৰ চৰকাৰ হ’ব৷ আজিৰ পৰাই টোপনি নোহোৱা হ’ব হাগ্রামা মহিলাৰীৰ৷ কোকৰাঝাৰত বিজেপিৰ চৰকাৰ হ’লে ভিচিডিচিসকলৰ জে’লতো টোপনি নোহোৱা হ’ব৷ কোকৰাঝাৰত ৰাইজৰ মতে চৰকাৰ হ’ব৷ ৰাইজে বিজেপিৰ লেকাম টানি থাকিব৷ কোকৰাঝাৰত বিজেপিৰ চৰকাৰ হ’লে মাটি বেচা–কিনাৰ আবেদন কৰিলে এছডিচিয়ে ১৫ দিনৰ ভিতৰত অনুমতি দিব লাগিব৷ বিটিচিত সূর্যৰ পোহৰ আহিব৷ শেষ হ’ব আন্ধাৰ৷’ একেখন নির্বাচনী সভাতে ভাষণ প্রদান কৰি বিজেপিৰ ৰাজ্যিক সভাপতি ৰঞ্জিত দাসে কয় যে এইবাৰ কোকৰাঝাৰত বিজেপিৰ নেতৃত্বতেই চৰকাৰ গঠন হ’ব৷ বিজেপিৰ চৰকাৰ হ’লে দুর্নীতিত লিপ্ত ভিচিডিচিসকল জে’ললৈ যাব লাগিব৷ সভাখনতে মথনগুৰি সমষ্টিৰ বিজেপিৰ প্রার্থী গৌতম দাস বিজয়ী হ’লে বিটিচি পৰিষদৰ কার্যবাহী সদস্য হিচাপে নির্বাচিত কৰা হ’ব বুলিও তেওঁ প্রতিশ্রুতি দিছে৷ সভাখনত বিজেপিৰ ৰাষ্ট্রীয় সভাপতি তথা সাংসদ দিলীপ শইকীয়াই তীক্ষ্ণ ভাষাৰে বিপিএফক সমালোচনা কৰে৷ শইকীয়াই কয়–‘আমি এখন হেলিকপ্ঢাৰ ভাৰা কৰি নির্বাচনী প্রচাৰ অভিযান চলাইছোঁ৷ কিন্তু ২৫খন হেলিকপ্ঢাৰ কিনিব পৰা সম্পত্তি গঢ়িছে হাগ্রামা আৰু বিপিএফৰ নেতাসকলে৷’ এইবাৰ কোকৰাঝাৰত বিজেপিৰ চৰকাৰ নিশ্চিত বুলি তেওঁ উল্লেখ কৰে৷ সভাত বৰপেটা সমষ্টিৰ অগপৰ বিধায়ক গুণীন্দ্র নাথ দাস, জিলা বিজেপিৰ সভাপতি শংকৰচন্দ্র দাস, মথনগুৰি সমষ্টিৰ প্রার্থী গৌতম দাসেও ভাষণ প্রদান কৰে৷