নিয়মীয়া বাৰ্তা, ১২ ডিচেম্বৰঃ ক’ৰোনাৰ সংক্রমণ ক্রমাৎ হ্রাস পাই অহাৰ সময়তে ৰাজ্যত শুকুৰবাৰে এহাজাৰ স্পর্শ কৰিলে ক’ৰোনাত মৃত্যুৰ সংখ্যাই৷ শুকুৰবাৰে কামৰূপ মহানগৰ জিলাৰ ৱাজিদা বিবি (৫২) নামৰ এগৰাকী মহিলা ক’ৰোনাত মৃত্যু হোৱাৰ পাছতেই অসমত ক’ভিড আক্রান্ত হৈ মৃত্যু হোৱা লোকৰ সংখ্যাই এহাজাৰ স্পর্শ কৰিলে৷ স্বাস্থ্যমন্ত্রী ড০ হিমন্ত বিশ্ব শর্মাই এই তথ্য প্রকাশ কৰে৷
উল্লেখ্য যে দেশত ক’ৰোনাই ভয়াৱহ ৰূপ লোৱাৰ সময়তে যোৱা ১০ এপ্রিলত ৰাজ্যত প্রথমজন ক’ৰোনা আক্রান্তৰ মৃত্যু হৈছিল৷ ইয়াৰ পাছতে ক্রমাৎ ক’ৰোনাত মৃত্যু হোৱা লোকৰ সংখ্যা বৃদ্ধি পায় যদিও বিগত দুটা মাহত মৃত্যু হোৱা লোকৰ সংখ্যা যথেষ্ট হ্রাস পাইছিল৷
ইফালে শুকুৰবাৰে পুনৰ ১২৭গৰাকী লোক ক’ৰোনাত আক্রান্ত হৈছে৷ স্বাস্থ্যমন্ত্রী ড০ শর্মাই টুইটযোগে প্রকাশ কৰা অনুসৰি যোৱা ২৪ ঘণ্টাত ৰাজ্যত ২১,০০২গৰাকী লোকৰ ক’ভিড পৰীক্ষা সম্পন্ন কৰাৰ পাছত ১২৭গৰাকী লোক আক্রান্ত বুলি চিনাক্ত হয়৷ আক্রান্তৰ হাৰ হ’ল ০.৬০ শতাংশ৷ কামৰূপ মহানগৰ জিলাত ৪৩গৰাকী লোক পজিটিভ চিনাক্ত হৈছে৷
এতিয়ালৈ ৰাজ্যত ক’ৰোনাত আক্রান্ত হৈছে ২,১৪,৪৩২গৰাকী লোক৷ আনহাতে, শুকুৰবাৰে বিভিন্ন চিকিৎসালয়ৰ পৰা ক’ৰোনামুক্ত হোৱা ১৪৯গৰাকী লোকক ৰিলিজ দিয়া হয়৷ অসমত ক’ৰোনামুক্ত হোৱা লোকৰ হাৰ হ’ল ৯৭.৯০ শতাংশ৷
অৱশ্যে এতিয়াও ক’ৰোনাত আক্রান্ত হৈ চিকিৎসাধীন হৈ আছে ৩,৪৯৩গৰাকী লোক৷ ক’ৰোনামুক্ত হৈ ঘৰলৈ উভতিছে ২,০৯,৯৩৬গৰাকী লোক৷ আক্রান্তৰ হাৰ হ’ল ১.৬৩ শতাংশ আৰু ক’ৰোনাত মৃত্যু হোৱা লোকৰ হাৰ হ’ল ০.৪৬ শতাংশ৷