নিয়মীয়া বাৰ্তা, ১৬ ডিচেম্বৰঃ প্রধান শিক্ষকৰ পদ সৃষ্টি আৰু স্নাতক শিক্ষকক ৮,৭০০ টকাৰ গ্রেড পে’ত দৰমহা দিয়াৰ প্রতিশ্রুতিক লৈ চৰকাৰে কৰি বঞ্চনাৰ বিৰুদ্ধে ক্ষুব্ধ হৈ পৰিছে ৰাজ্যৰ প্রাথমিক শিক্ষকসকল৷ বাৰম্বাৰ আশ্বাস দিয়াৰ পিছতো আজিপর্যন্ত চৰকাৰে এইক্ষেত্রত কার্যকৰী ব্যৱস্থা গ্রহণ নকৰাত পৰৱর্তী কার্যপন্থা গ্রহণ কৰিবলৈ সাজু হৈছে৷
অহা ২০ ডিচেম্বৰত অসম ৰাজ্যিক প্রাথমিক শিক্ষক সন্মিলনীৰ কার্যনির্বাহক সভাতে পৰৱর্তী কার্যপন্থা গ্রহণ কৰিব৷ এক বিবৃতিযোগে এই কথা সদৰী কৰিছে সন্মিলনীৰ প্রধান সম্পাদক ৰাতুল গোস্বামীয়ে৷ এক বিবৃতিত তেওঁ কয় যে অহা ২০ ডিচেম্বৰত চানমাৰিস্থিত শিক্ষক ভৱনত দিনৰ ১১ বজাৰ পৰা কার্যনির্বাহক সভা অনুষ্ঠিত হ’ব৷ এই সভাতে পৰৱর্তী সিদ্ধান্ত গ্রহণ কৰা হ’ব৷ গ্রেড পে’ ঘূৰাই দিয়া আৰু প্রধান শিক্ষকৰ পদ সৃষ্টিৰ ক্ষেত্রত ব্যৱস্থা গ্রহণ নকৰিলে সন্মিলনী কোনো কাৰণতে বহি নাথাকে বুলি তেওঁ হুংকাৰ দিয়ে৷
এই প্রসংগত সভাপতি জীৱন চন্দ্র বৰা আৰু প্রধান সম্পাদক ৰাতুল চন্দ্র গোস্বামীয়ে কয়– ‘২০১৯ বর্ষৰ ৩০ ডিচেম্বৰত মুখ্যমন্ত্রীয়ে দুয়োটা সমস্যা সমাধানৰ বাবে নির্দেশ দিছিল৷ পৰৱর্তী সময়ত যোৱা ৫ আৰু ১৪ নৱেম্বৰতো ৰাজ্য চৰকাৰৰ সৈতে দুলানি আলোচনা অনুষ্ঠিত হৈছিল৷ এই আলোচনা যথেষ্ট সৌহার্দ্যপূর্ণ আছিল৷ সেয়েহে এই আলোচনাৰ ফলাফলৰ কার্যকৰী ৰূপ দিয়াটো চৰকাৰৰ দায়িত্ব৷ কিন্তু এইক্ষেত্রত বিভাগীয় গতি অতি লেহেম৷ যাৰ বাবে পৰৱর্তী পদক্ষেপ কি গ্রহণ কৰা হ’ব, সেই সন্দর্ভত শিক্ষকসকলৰ সৈতে মত বিনিময় কৰিছে৷’ উল্লেখ্য যে ইয়াৰ পূর্বেও গ্রেড পে’ বৃদ্ধিৰ লগতে বিভিন্ন সমস্যা সমাধানৰ দাবীত প্রাথমিক শিক্ষকসকলে কেইবাবাৰো প্রতিবাদী কার্যসূচী ৰূপায়ণ কৰিছিল৷