নিয়মীয়া বাৰ্তা , ১৮ জানুৱাৰী: চিৰাং জিলাৰ অন্তৰ্গত ৩১ নং চিদলী (জনজাতি) বিধানসভা সমষ্টিৰ চূড়ান্ত ভোটাৰ তালিকা আজি প্ৰকাশ কৰা হয়। নিৰ্বাচক পঞ্জীয়নৰ নিয়ম ১৯৬০ মতে ২০২১ বৰ্ষৰ পহিলা জানুৱাৰী দিনটোক ভিত্তি হিচাপে লৈ প্ৰস্তুত কৰি উলিওৱা চূড়ান্ত ভোটাৰ তালিকাখন আজি কাজলগাঁৱৰ আৱৰ্ত ভৱনত অনুষ্ঠিত এখন সভাত জিলা উপায়ুক্ত গৌতম তালুকদাৰে আনুষ্ঠানিকভাৱে প্ৰকাশ কৰে। সমষ্টিটোৰ মুঠ ভোটাৰৰ সংখ্যা হৈছে ২০৫০৩৮ জন । ইয়াৰে পুৰুষ ভোটাৰ ১০২৫৮৬ জনৰ বিপৰীতে মহিলা ভোটাৰ সংখ্যা ১০২৪৪৬ গৰাকী আৰু ৬ গৰাকী তৃতীয় লিংগৰ ভোটাৰ। উল্লেখ্য যে দুই মাহ পূৰ্বে অৰ্থাৎ যোৱা ২০২০ বৰ্ষৰ ১৮ নৱেম্বৰত প্ৰকাশ কৰা খচৰা ভোটাৰ তালিকাৰ পৰা সৰ্বমুঠ ৭৭০৫ জনৰ নাম কৰ্তন কৰাৰ পাছত চূড়ান্ত তালিকা প্ৰস্তুত কৰি প্ৰকাশ কৰা হয়।।