নিয়মীয়া বাৰ্তা ১০ মাৰ্চঃ উগ্র সাম্প্রদায়িক মন্তব্যৰে সংখ্যালঘু লোকসকলৰ ভোট আদায়ৰ চেষ্টা কৰা বদৰুদ্দিন আজমলৰ আন এক চাঞ্চল্যকৰ ভিডি’ প্রকাশ কৰিছে লিগেল ৰাইটছ অৱজাৰভেটৰী নামৰ সংগঠনটোৱে৷ টুইটযোগে সংগঠনটোৱে প্রকাশ কৰা ভিডি’টোত এআইইউডিএফৰ সভাপতি তথা সাংসদ বদৰুদ্দিন আজমলে ইউপিএৰ সহযোগত ভাৰতক ইছলামিক দেশ হিচাপে গঢ়ি তুলিব বুলি হুংকাৰ দিছে৷ ভিডি’টোত বদৰুদ্দিন আজমলে এইদৰে কয়–‘এই ভাৰতবর্ষত ৮০০ বছৰ মোগলে শাসন কৰিছিল৷ এই দেশ ইছলামিক দেশ হ’ব৷ যেতিয়া ইউপিএৰ সহযোগত মহাগোটবন্ধনৰ চৰকাৰ হ’ব, সেই চৰকাৰৰ অংশীদাৰী হ’ব ইউডিএফ৷ তেতিয়া দেশত এজনো হিন্দু মানুহ নাথাকিব৷ সকলোকে মুছলমান কৰা হ’ব৷’
উল্লেখ্য যে বিধানসভা নির্বাচনৰ প্রাক্ক্ষণত সংগঠনটোৱে প্রকাশ কৰা এই বিশেষ ভিডি’টোৱে তাৎপর্য বহন কৰিছে৷ কিয়নো অসমত বিধানসভা নির্বাচনত শাসনৰ গাদী দখলৰ লক্ষ্যৰে কংগ্রেছ, আঞ্চলিক গণ মর্চা আৰু বাঁওপন্থী দলসমূহৰ সৈতে মিলি এআইইউডিএফে মহাজোঁট গঠন কৰিছে৷ ইতিমধ্যে নির্বাচনী প্রচাৰৰ সময়ত সাংসদ আজমলে উগ্র সাম্প্রদায়িক মন্তব্য কৰাও পৰিলক্ষিত হৈছে৷ বিজেপি শাসনলৈ আহিলে মছজিদ ভাঙি পেলাব তথা নামাজ পঢ়াত বাধা দিব বুলিও মন্তব্য কৰিছিল বদৰুদ্দিন আজমলে৷ ছলে–বলে–কৌশলে সংখ্যালঘুৰ ভোট আদায়ৰ বাবে আজমলে কৰি অহা এনে মন্তব্যই ৰাজ্যত সাম্প্রদায়িক সংঘর্ষৰ সৃষ্টি কৰিব বুলিও সচেতন মহলে আশংকা প্রকাশ কৰি আহিছে৷ এনে সময়তে লিগেল ৰাইটছ অৱজাৰভেটৰিয়ে প্রকাশ কৰা এই চাঞ্চল্যকৰ ভিডি’টোৱে স্বাভাৱিকতেই ৰাজ্যবাসীৰ মনত প্রতিক্রিয়াৰ সৃষ্টি কৰিছে৷