নিয়মীয়া বাৰ্তা, ৪ এপ্ৰিল: দুলীয়াজান বেডমিণ্টন ক্লাবৰ উদ্যোগত আজিৰে পৰা আৰম্ভ হৈছে প্রথমবাৰৰ বাবে সদৌ অসম ভিত্তিক পুৰুষৰ দ্বৈত বেডমিণ্টন প্রতিযোগিতা৷ দুদিনীয়াকৈ দুলীয়াজান ইনড’ৰ ষ্টেডিয়ামত আৰম্ভ হোৱা প্রতিযোগিতাখনত ৰাজ্যখনৰ বিভিন্ন প্রান্তৰ ১০৬গৰাকী প্রতিযোগীয়ে অংশগ্রহণ কৰিছে৷ তিনিটা শাখাত অনুষ্ঠিত প্রতিযোগিতাখন বিয়লি আনুষ্ঠানিকভাৱে উদ্বোধন কৰে অইল ইণ্ডিয়া লিমিটেডৰ কার্যবাহী সঞ্চালক প্রশান্ত বৰকাকতিয়ে৷
উদ্বোধনী অনুষ্ঠানত আন্তঃৰাষ্ট্রীয় বেডমিণ্টন খেলুৱৈ কৃষ্ণা ডেকাৰজা ছেত্রীকে ধৰি বহুকেইগৰাকী বিশিষ্ট ব্যক্তি উপস্থিত থাকে৷ ইয়াৰ পূর্বে পুৱা পতাকা উত্তোলন কৰে ক্লাবৰ সভাপতি প্রশান্ত তামুলীয়ে৷ স্মৃতি তর্পণ কৰে দুলীয়াজান ক্লাবৰ সম্পাদক ৰঞ্জন মহন্ত আৰু বন্তি প্রজ্বলন কৰে বেডমিণ্টন ক্লাবৰ উপদেষ্টা বিভূতি বৰুৱাই৷