প্রতিখন আৰক্ষী থানালৈ অত্যাধুনিক চাইবাৰ কিট

নিয়মীয়া বাৰ্তা ২৯ জুনঃ অপৰাধ ৰোধ কৰিবলৈ অসম আৰক্ষীক দিয়া হৈছে অত্যাধুনিক ৰূপ৷ বিশেষকৈ চাইবাৰ অপৰাধৰ ক্ষেত্রত তৎকালে ব্যৱস্থা গ্রহণ কৰিবৰ বাবে অসম আৰক্ষীয়ে গ্রহণ কৰিছে কেইবাটাও অভিলাষী প্রকল্প৷ ইয়াৰে অংশ হিচাপে সোমবাৰে ৰাজ্যৰ আৰক্ষী সঞ্চালকপ্রধান ভাস্কৰজ্যোতি মহন্তই চি আই ডিৰ মুখ্য কার্যালয়ত মুকলি কৰে ‘চাইবাৰ ফৰেনছিক পৰীক্ষাগাৰ আৰু প্রশিক্ষণ কেন্দ্র’৷ কেন্দ্রীয় চৰকাৰৰ গৃহ মন্ত্রালয়ৰ মহিলা আৰু শিশুৰ বিৰুদ্ধে হোৱা চাইবাৰ অপৰাধ প্রতিৰোধ আইনৰ অধীনত অসমত এই পৰীক্ষাগাৰ আৰু প্রশিক্ষণ কেন্দ্র স্থাপন কৰা হৈছে৷ অসম চাইবাৰ ফৰেনছিক পৰীক্ষাগাৰ স্থাপনত মুঠ ব্যয় হৈছে ৩.৯২ কোটি টকা৷ আধুনিক সা–সুবিধাসম্পন্ন পৰীক্ষাগাৰটোত চাইবাৰ ফৰেনছিক টুল, ডিস্ক ফৰেনছিক, জি পি এছ ফৰেনছিকছ, ম’বাইল ফৰেনছিক, ডাটা ৰিক’ভাৰী, ইমেজিং আদিৰ প্রযুক্তি উপলব্ধ হ’ব৷

সমান্তৰালভাৱে ২৫গৰাকী আৰক্ষী বিষয়ায়ো একে সময়তে ইয়াত প্রশিক্ষণ গ্রহণ কৰিব পাৰিব৷ একেদৰে মৈত্রী আঁচনিৰ অধীনত ৰাজ্যৰ ২৪৫খন থানালৈ প্রদান কৰা হৈছে চাইবাৰ ক্রাইম ৰেচপনডাৰ কিটছ৷ প্রতিটো কিটৰ মূল্য হ’ল ১৩.৫৩ লাখ টকা৷ উচ্চ প্রযুক্তিসম্পন্ন এই কিট আৰক্ষীয়ে যিকোনো অপৰাধস্থলীৰ পৰা তথ্য–প্রমাণ সংগ্রহ আৰু সংৰক্ষণৰ ক্ষেত্রত সহায়ক হ’ব৷ একেদৰে ৰাজ্যত সঘনে চাইবাৰ প্রৱঞ্চনাৰ ঘটনা সংঘটিত হ’বলৈ ধৰিছে৷ অচিনাকি নম্বৰৰ পৰা অহা ফোন কলৰ জৰিয়তে বহু লোকৰ বেংকৰ ধন লুট কৰি নিছে৷ এনে অপৰাধ ৰোধ কৰিবৰ বাবে অসম আৰক্ষীয়ে মুকলি কৰিছে এটা টোল ফ্রী নম্বৰ৷

কোনো ব্যক্তি চাইবাৰ প্রৱঞ্চকৰ কবলত পৰিলে ২৪ ঘণ্টাৰ ভিতৰত ১৫৫২৬০ নম্বৰত ফোন কৰি অভিযোগ দাখিল কৰিব পাৰিব৷ আৰক্ষীয়ে অভিযোগ পোৱাৰ পাছত তৎকালে বেংকৰ ধন সুৰক্ষিত কৰিবলৈ যাৱতীয় ব্যৱস্থা গ্রহণ কৰিব৷ কিন্তু প্রৱঞ্চনাৰ সন্মুখীন হোৱাৰ ২৪ ঘণ্টাৰ ভিতৰত অভিযোগ দাখিল কৰিলেহে আৰক্ষীয়ে ফলপ্রসূ ব্যৱস্থা গ্রহণ কৰিব পাৰিব৷ আজি এই নতুন ব্যৱস্থাসমূহ মুকলি কৰি ডি জি পি ভাস্কৰজ্যোতি মহন্তই কয় যে চাইবাৰ অপৰাধৰ ক্ষেত্রত অসম দেশৰ অন্যতম হটস্পটত পৰিণত হৈছে৷ অসম আৰক্ষীত নতুনকৈ সংযোজিত হোৱা প্রযুক্তিয়ে চাইবাৰ অপৰাধ ৰোধ কৰাৰ ক্ষেত্রত উল্লেখযোগ্য ভূমিকা পালন কৰিব৷