জনসমাগম নিয়ন্ত্রণ কৰিবলৈ কেন্দ্রৰ নির্দেশনা

নিয়মীয়া বাৰ্তা ১৫ জুলাইঃ আসন্ন ক’ভিড–১৯ৰ তৃতীয় জোৱাৰক লৈ এলার্ট জাৰি কৰিছে কেন্দ্রীয় চৰকাৰে৷ দেশৰ ৰাজ্য আৰু কেন্দ্রীয়শাসিত অঞ্চলসমূহলৈ ক’ৰোনা ভাইৰাছৰ তৃতীয় জোৱাৰক ৰুধিবলৈ সঠিক আচৰণ মানিবলৈ পত্রযোগে নির্দেশ দিছে কেন্দ্রীয় চৰকাৰে৷ তৃতীয় জোৱাৰ প্রতিহত কৰিবলৈ হ’লে জনসমাগম নিয়ন্ত্রণ কৰিব লাগিব৷ অন্যথা প্রতিবন্ধকতা পুনৰ বলৱৎ কৰিব লাগিব বুলিও নির্দেশনাত স্পষ্ট কৰি দিছে কেন্দ্রই৷ কেন্দ্রীয় গৃহ সচিব অজয় ভাল্লাই প্রেৰণ কৰা পত্রখনত উল্লেখ কৰা হৈছে যে দেশৰ ভিন্ন প্রান্তত বিশেষকৈ ৰাজহুৱা পৰিবহণ আৰু পাহাৰীয়া ৰাজ্যসমূহত ক’ভিড নির্দেশনা ব্যাপক হাৰত উলংঘন কৰা হৈছে৷

বজাৰসমূহত জনতাই ভিৰ কৰিছে, কোনো ধৰণৰ সামাজিক দূৰত্বৰ নিয়ম মানি চলা নাই৷ এনে পৰিপ্রেক্ষিতত ক’ভিড–১৯ৰ তৃতীয় জোৱাৰক দেশবাসীয়ে আমন্ত্রণ কৰাৰ লেখীয়া হ’ব বুলি উল্লেখ কৰি কেন্দ্রীয় গৃহ সচিবগৰাকীয়ে ৰাজ্য আৰু কেন্দ্রীয়শাসিত অঞ্চলসমূহক ক’ভিড প্রট’কল সঠিকভাৱে মানি চলিবলৈ নির্দেশ দিছে৷

ইপিনে ক’ভিড–১৯ৰ দ্বিতীয় জোৱাৰৰ সংক্রমণৰ হাৰ নিম্নগামী হৈ আছে যদিও দেশত এতিয়াও এদিনত ৩৮ সহস্রাধিক লোক আক্রান্ত হৈ আছে৷ যোৱা ২৪ ঘণ্টাত দেশজুৰি আক্রান্ত হৈছে ৩৮,৭৯২৷ এই সংখ্যা কালিৰ তুলনাত ১ হাজাৰ অধিক৷ এনেদৰে যোৱা ২৪ ঘণ্টাত মৃত্যু ঘটিছে ৬২৪জনৰ৷ লক্ষণীয় যে কালি দেশত ২,০২০জন লোকৰ মৃত্যু হোৱাৰ বিপৰীতে যোৱা ২৪ ঘণ্টাত ৬২৪জনৰ মৃত্যু ঘটাটো সামান্য সকাহমূলক৷ কেন্দ্রীয় স্বাস্থ্য মন্ত্রালয়ৰ তথ্য অনুসৰি যোৱা ২৪ ঘণ্টাত ৪১ হাজাৰ লোক সুস্থ হৈ উঠিছে৷

ইয়াকে লৈ সুস্থ হোৱা লোকৰ সংখ্যা ৩,০১,০৪,৭২০লৈ বৃদ্ধি পাইছে৷ তেনেদৰে ৩৮,৭৯২জন আক্রান্ত হোৱাত মুঠ সংখ্যা ৩,০৯,৪৬,০৭৪জনলৈ বৃদ্ধি পাইছে৷ দেশত সম্প্রতি সক্রিয় ক’ভিড ৰোগীৰ সংখ্যা ৪,২৯,৯৪৬জন৷ মৃতকৰ সংখ্যা ৪,১১,৪০৮জন৷ উল্লেখ্য যে আজি পুৱা ৬ বজালৈকে দেশজুৰি মুঠ ৩৮,৭৬,৯৭,৯৩৫ ড’জ ভেকচিন প্রদান কৰা হৈছে৷ উনুকিয়াব পাৰি যে প্রথম জোৱাৰৰ তুলনাত দ্বিতীয় জোৱাৰত দেশত অধিক লোকৰ প্রাণহানি হৈছে৷ তথ্যমতে প্রথম জোৱাৰৰ তুলনাত দ্বিতীয় জোৱাৰত প্রায় ১ লাখ লোকৰ মৃত্যু ঘটিছে৷ স্বাস্থ্য মন্ত্রালয়ৰ তথ্য অনুসৰি দ্বিতীয় জোৱাৰত অর্থাৎ ১ মার্চ, ২০২১ৰ পৰা এতিয়ালৈকে দেশত প্রাণহানি হৈছে ২.৫৪ লাখৰ৷ ইয়াৰ পূর্বে ২০১৯ চনত ক’ভিড পাদুর্ভাৱ হোৱাৰ সময়ৰে পৰা দ্বিতীয় জোৱাৰ অহাৰ আগমুহূর্তলৈকে দেশত মৃত্যু ঘটিছিল ১.৫৭ লাখ৷ দুয়োটা জোৱাৰ মিলি দেশত ৪,১১,৪৩৫জনৰ মৃত্যু ঘটিছে৷
নতুনকৈ পজিটিভ ২,০৪৭ঃ গোলাঘাট জিলাত সর্বাধিক ২২৮জন আক্রান্ত
ৰাজ্যত সামান্য পৰিমাণে হ্রাস পাইছে ক’ভিডৰ সংক্রমণ৷ বুধবাৰে ৰাজ্যত ক’ভিডৰ সংক্রমণ ১.৫৪ শতাংশলৈ হ্রাস পাইছে৷ আজি নতুনকৈ আক্রান্ত হৈছে ২,০৪৬জন৷ আক্রান্তসকলৰ ভিতৰত সর্বাধিক ২২৮জন গোলাঘাট জিলাৰ৷ তদুপৰি কামৰূপ মহানগৰৰ ২০৭জন, শিৱসাগৰৰ ১২২জন আৰু লখিমপুৰৰ ১১৫জন লোক ক’ভিডত আক্রান্ত হৈছে৷ বিগত ২৪ ঘণ্টাত ১,৩২,৫৫৭টা নমুনাৰ পৰীক্ষা সম্পন্ন কৰা হৈছে৷ ক’ভিডত আক্রান্ত হৈ মৃত্যু হৈছে ২২জন লোকৰ৷ মৃত্যু হোৱা লোকসকলৰ ভিতৰত সর্বাধিক ৩জন লোক লখিমপুৰৰ৷ তদুপৰি গোলাঘাট–যোৰহাট–কা মহনগৰ–কার্বি আংলঙৰ দুজনকৈ আৰু কাছাৰ–চিৰাং–ডিব্রুগ এজনকৈ লোকৰ মৃত্যু ঘটিছে ক’ভিডত৷ আজি ক’ভিডৰ পৰা সুস্থ হৈছে ২,৬৫৫জন৷ সম্প্রতি চিকিৎসাধীন হৈ থকা ৰোগীৰ সংখ্যা হৈছে ১৯,৬৫৩জন৷