নিয়মীয়া বাৰ্তা, ২২ ছেপ্তেম্বৰ : কামৰূপ জিলাৰ ছয়গাঁও আৰক্ষীয়ে ড্ৰাগছ, মদ আৰু অবৈধ কাৰ্যকলাপৰ বিৰুদ্ধ অভিযান অব্যাহত ৰাখিছে । এই অভিযান অব্যাহত থকাৰ সময়তে সময়তে ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকৰ এক গোপন খবৰ ভিত্তিত জোৰশিমূলীত অভিযান চলাই বৃহৎ পৰিমাণৰ নিষিদ্ধ কফ চিৰাফ জব্দ কৰাৰ লগতে এজন লোকক আটক কৰিবলৈ সক্ষম হয় । আৰক্ষীয়ে আটক কৰা লোকজন হল জোৰশিমুলীৰ আবুল হুছেইন ।
জানিব পৰা মতে, উক্ত লোকজনে দীৰ্ঘদিন ধৰি জোৰশিমূলীৰ নিজৰ ঘৰত অবৈধ ভাবে নিষিদ্ধ কফ চিৰাফ মজুত ৰাখি ব্যৱসায় কৰি আহিছিল । এই খবৰ ছয়গাঁও আৰক্ষী থানাৰ ভাৰপ্ৰাপ্ত বিষয়া কপিল পাঠকে লাভ কৰাৰ পিছতে আজি আৰক্ষীৰ এটা দলে অভিযান চলাই নিষিদ্ধ কফ চিৰাফ লগতে উক্ত লোকজনক আটক কৰিবলৈ সক্ষম হয় । উল্লেখ্য যে ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকে ছয়গাঁও আৰক্ষী থানাত ভাৰপ্ৰাপ্ত আৰক্ষী বিষয়া হিচাপে যোগদান কৰাৰ পিছৰে পৰা ড্ৰাগছ, মদ, বাইক চুৰি চক্ৰকে ধৰি বিভিন্ন অবৈধ কাৰ্যকলাপৰ বিৰুদ্ধে কঠোৰ স্থিতি গ্ৰহণ কৰাৰ বাবে সচেতন মহলে ভূয়সী প্ৰশংসা কৰিছে ।