নিয়মীয়া বাৰ্তা ৩ নৱেম্বৰঃ বৰপেটা জিলাৰ ৰূপসী প্ৰাথমিক শিক্ষা খণ্ডৰ অন্তৰ্গত ১৭৪৬ নং দক্ষিণ ঘুগুৱাৰী প্ৰাথমিক বিদ্যালয়ৰ প্ৰধান শিক্ষক ৰবীন দাসক বিদ্যালয় কৰ্তৃপক্ষৰ ফালৰ পৰা বিদায়ী সম্বৰ্ধনা জ্ঞাপন কৰা হয়।
উল্লেখ্য যে, প্ৰধান শিক্ষক ৰবীন দাসে যোৱা ৩১ অক্টোবৰত চাকৰিৰ পৰা অৱসৰ গ্ৰহণ কৰে। সেই উপলক্ষে আজি বিদ্যালয় প্ৰাঙ্গনত দক্ষিণ হালধীয়া পাথাৰ মণ্ডল সমল কেন্দ্ৰ সমন্বয়ক শ্বহীদুল ইছলামৰ সভাপতিত্বত এখন বিদায়ী সভা অনুষ্ঠিত হয়। সভাৰ উদ্দেশ্য বাখ্যা কৰে বিদ্যালয় খনৰ ভাৰপ্ৰাপ্ত প্ৰধান শিক্ষয়িত্ৰী ৰশ্মি ৰাণী দেৱীয়ে। সভাত অৱসৰী প্ৰধান শিক্ষয়িত্ৰী ছালেহা খাতুন ৯৩১ নং হালধীয়া পাথাৰ প্ৰাথমিক বিদ্যালয়ৰ প্ৰধান শিক্ষয়িত্ৰী সবিতা নাথ আৰু বিদ্যালয় পৰিচালনা সমিতিৰ সভাপতি ৰমেজ আলীয়ে অৱসৰী প্ৰধান শিক্ষকৰ প্ৰতি কৃতজ্ঞতা জনাই বক্তব্য ৰাখে। সভাত বিদায়ী প্ৰধান শিক্ষক ৰবীন দাসক ফুলাম গামোছা, শৰাই,ফুলৰ থোপা আৰু মানপত্ৰৰে সম্বৰ্ধনা জনোৱা হয়।
উল্লেখ্য যে অৱসৰী শিক্ষক গৰাকী বৰপেটা মহকুমা প্ৰাথমিক শিক্ষক সন্মিলনৰ সভাপতিৰ দায়িত্ব গ্ৰহণ কৰাৰ উপৰিও এইবেলি শিক্ষক দিৱসত শিক্ষকৰ বঁটাও লাভ কৰিছিল।সভাত চি আৰ চি চি শ্বহীদুল ইছলামে বক্তব্যত শিক্ষক গৰাকীৰ কৰ্মৰাজীৰ আলোকপাত কৰি আগন্তুক দিনতো শিক্ষাৰ সৈতে জড়িত থাকি সমাজসেৱা আগবঢ়াবলৈ অনুৰোধ জনায়।অৱসৰী শিক্ষক গৰাকীয়ে ভাষণত নিজৰ কৰ্মজীৱনৰ স্মৃতি ৰোমন্থন কৰি আৱেগিক হৈ পৰে।
Input: মফিদুল ইছলাম,কলগাছিয়া