নিয়মীয়া বাৰ্তা ১৪ নৱেম্বৰঃ মহানগৰীৰ বেলতলাৰ টকিঅ’ টাৱাৰ হোটেলত ‘কামৰূপী নাৰায়ণী’ শীর্ষক এটা বিশেষ মিউজিক ভিডি’ মুকলি কৰা হয়৷ গুণগণ প্রডাকচনে চাৰি বছৰৰ দীর্ঘ প্রস্তুতিৰ অন্তত মুকলি কৰা এই মিউজিক ভিডিঅ’টোত কামাখ্যা দেৱীৰ আৰাধনা তথা ভক্তিমূলক উপজীব্যক মূল আধাৰ হিচাপে লোৱা হৈছে৷ ৰাষ্ট্রীয় পুৰস্কাৰপ্রাপ্ত সংগীত শিল্পী তৰালি শর্মাই সংগীতেৰে সজোৱা তথা কণ্ঠ নিগৰোৱা এই বিশেষ গীতটো লিখিছে গুণগুণ কাশ্যপে৷ গুণগুণ কাশ্যপৰ দীর্ঘদিনীয়া পৰিকল্পনাৰ ফচল এই বিশেষ গীতটো মুকলি কৰে সাংবাদিক নিতুমণি শইকীয়াই৷
এই মিউজিক ভিডিঅ’টো উদ্বোধন কৰি সাংবাদিকগৰাকীয়ে কয় যে এই বিশেষ গীতটোৱে ভক্তিমূলক সংগীতত এটা বিশেষ ধাৰাৰ সৃষ্টি কৰিব৷ অনুষ্ঠানত বিশিষ্ট লেখক প্রভাত গোস্বামী, ভিডি’টোৰ গায়িকা তথা সংগীত পৰিচালক ৰাষ্ট্রীয় খ্যাতিসম্পন্ন শিল্পী তৰালি শর্মাৰ লগতে বহু বিশিষ্ট ব্যক্তি উপস্থিত থাকে৷ ভাষণ প্রসংগত গোস্বামীয়ে কয় যে নৃত্যশিল্পী কৌশিক কুমাৰ সন্দিকৈৰ নির্দেশনাত গুণগুণ কাশ্যপৰ নৃত্যই এই মিউজিক ভিডি’টোক অনন্য মাত্রা প্রদান কৰিছে৷